「熱暑人」教落,酷熱天氣,最佳建議當然係避免戶外活動,以免中暑。不過,叫大家留喺屋企嘆冷氣未必啱聽,若果大家要夏天行山遠足,唯有係選擇一啲唔會曝曬嘅路線。

山徑有「遮蔽度」

漁護署嘅「郊野樂行」網站,羅列全港漁護署轄下嘅山徑,仲有好方便嘅撿索方法,畀大家搵到想行嘅地方。早前佢哋更新個網站,加入山徑嘅「遮蔽度」。

最高為三塊樹葉,代表路徑廣植大樹,普遍地方都有樹蔭,咁夏天行山唔怕暴曬,行得無咁辛苦。

新娘潭自然教育徑有大量樹蔭,有三塊樹葉。
芝麻灣郊遊徑得一塊樹葉,即係要暴曬。

有樹蔭都可以中暑

不過有樹蔭亦唔可以完全避免中暑,如果樹木太濃密,可令環境濕度升高,空氣唔流通,反而身體感受嘅溫度更高。此外,行山要避免中暑,亦要出行前做好準備:

1. 帶備充食水

大概每10公里帶1公升飲用水,而背囊要維持約500毫升後備水。 (見《水多人不怪? 行山帶水有學問》)

2. 定時飲水

唔好等口渴先飲水,亦唔好只在休息時飲。要定時飲水,避免身體缺水。

3. 提升裝備

太陽帽、透汗衣褲、毛巾等缺一不可。炎夏行山比冬天行山裝備要更齊備。

4. 規劃路線

規劃路線不要過份進取,要量力而為,亦可行走多樹蔭、有溪澗的山徑。

5. 結伴同行

酷熱之下行山屬高危活動,搵多個同伴,有咩事都可以支援。

山徑幾時都喺到,天氣情況太惡劣,絕對唔應該勉強而行!


Fitz 提提你
任何行山遠足活動,必須在出發前作出詳細規劃以及準備,擕帶充足及合適裝備,以及告知親友目的地及回程時間。制訂路線,更要量力而為,注意補水,切忌逞強冒進。更多:《[顧己及人] 山野遠足安全常識

資料: 郊野樂行


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。