是咁的，連續呢幾個周末郊外都人滿為患，大家為咗健康去行山，因而逼爆山頭，而且太多人無公德心，亂拋垃圾，做成大災難。喺大家都話要鬧爆呢啲人，或者發起自行上山執垃圾嘅同時，退一百萬步諗: 會唔會佢哋唔識點樣揼垃圾呢?
當我籌備呢篇文嘅時候，睇返我影嘅垃圾相，原來垃圾會說話，從垃圾嘅情況，可以知道丟垃圾嘅人犯咗咩錯。
果皮係唔會分解
無錯，橙皮、香蕉皮以至蘋果皮都屬於有機物，會被大自然分解。不過分解需時，你今日丟咗塊橙皮，如果無人清理，一個禮拜，一個月，甚至一年，都會喺山上面見到。
下面呢塊橙皮曬下曬下，就嚟變到陳皮，可以煲湯了。
其實拎生果行山最好嘅方法，就係喺屋企搣好皮，切開一件件，用餐盒入好拎上山。既唔會製造郊野廢物，食嘅時候又唔會整污糟雙手。
袋好你嘅垃圾
大師兄山雞話齋「同情地諒解」，就當大家都唔係有心上山亂拋垃圾，咁啲垃圾又點嚟呢? 其中一部份，應該係大家放垃圾喺身嘅時候，唔覺意將啲垃圾跌番落地。好似上圖呢種背囊，側邊有兩個細細地嘅網，畀你放下雜物或者插支水。你唔將垃圾放好嘅話，行下行下件垃圾就好容易跌出嚟。
至於成日喺山徑上面見到嘅紙巾，估計有啲係大家袋喺褲袋之後，又唔覺意跌咗佢哋出嚟，因為唔少都係喺路中心見到。
最好嘅方法，就係拎個垃圾袋上山，有垃圾就放入垃圾袋，然後放入背囊。
棄掉多餘包裝
行山大家都唔想拎多餘嘅嘢，但奇怪在大家上山前唔清理好啲多餘包裝。就好似下面呢件垃圾，估計係某本地飲品嘅包裝。其實買完畀錢之後，即係一手將包裝紙丟入垃圾，一勞永逸，又唔使帶上山。
至於餅乾、糖果，以至濕紙巾，盡可能唔使用獨立包裝啦。包裝紙嘅頭頭尾尾你一拎唔實就好易畀風吹到周圍到係，人哋好難執架。
喺到行就唔好喺到屙
行幾鐘頭山，一時人有三急又確實幾濕滯。要搞到周地解決可能都無計可施，不過行緊大路，望到樹叢裏面有堆廁紙真係好鬼嘔心囉。要去嘅話，行入兩步啦。
一招教你揼垃圾
講咗咁耐，其實行山要揼垃圾都係得一招，就係拎個垃圾袋上山，有咩要丟就丟入個袋! 行完山，成袋垃圾拎返去市區先揼!
記住，你拎幾多嘢上山，亦都要拎番幾多嘢落山，無人會負責處理你製造出嚟嘅廢物!
延伸閱讀
