周末後,行山群組有人發帖,引來熱烈討論:

圖: 香港行山遠足之友(吹水山谷)

話說,有人在下午時份在鬼手岩一帶徒步出大美督,遇到兩位行山人士慢慢行。一問之下,原來呢兩位仁兄參加嘅另一個行山團,因為團友覺得佢哋行得太慢決定唔等,要佢哋慢慢行番出去搭車。據講呢兩位仁兄最終都安全返家,大團圓結局。

事後引發多方面討論,有人覺得領隊無照顧好隊友,違反帶團操守,應該要「齊上齊落」; 有人又話一般民間自發嘅行山團,都會講明「不設殿後」,行得慢跟唔上大隊就要自己諗辦法。總之,大家對帶團領隊,以至參與行山團團友,都有唔同意見。

圖: 囉嗦大叔

不過,有一件事無人可以否認,就係行山團絕對唔係小學生旅行嘅「鴨仔團」,參加者唔應該用跟鴨仔團心態去參與活動。因為去到郊野,除咗自己之外,無人可以保障你人生安全。呢次兩位慢腳團友被遺棄,好彩能夠脫險,但如果真係發生意外,最終受害都係自己。

Join團4大注意

二級山藝教練吳銨洋 Ken sir,亦表示領隊與團友都要對安全負責。Ken sir 覺得,由專業團體所搞嘅行山團當然較有保障,不過時下唔少市民都會喺網上相約行山,咁大家 join 團時就有幾方面需要留意:

二級山藝教練 Ken sir

1. 口碑好緊要

大多數情況,呢啲網上行山團無得監管,所以參加者更加要做好準備。參加前先了解帶團人士嘅經驗、學識、專業資格、口碑等

2. 量力而為

參加行山團前,先要清楚路線對體力、技術嘅要求。自問係新手就唔好行鬼手 (鬼手岩路線達5星難度)。而出發當日若狀態不佳或身體不適,切勿勉強出行

3. 起行前做資料搜集

參加行山團唔同參加順德美食團,你唔係跟住領隊就得,因郊野地方往往危機四伏,跟人行山都要照顧自己,起行前亦要做足準備,萬一脫隊都可以應付危險。最簡單,就如先了解相關路線資料,帶備足夠糧食飲用水電筒,以備不時之需

4. 結伴而行

呢啲自發行山團通常採取自助方式,領隊會按預先安排嘅步伐,團員自己跟隨。某些更講明「不設殿後」,行得慢閣下自理。所以,就算參加行山團,最好亦搵個朋友一齊,萬一被人中途遺棄,亦有個朋友可以互相照應

Ken sir 亦話,近年上網問路線嘅文化,亦令更多人唔肯按步就班去行山。唔少人只求去景點打卡,於是往往「越級挑戰」,行一啲應付唔到嘅路線,唔少意外因而發生。


文章為作者意見,不代表Fitz立場。

歡迎投稿: https://fitz.hk/contribute/

廣告
朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。