[毅行備戰2016] 官方補給站有咩提供?

最初嘅毅行者（即係97年以前）有英軍負責支援，佢哋以軍隊方法去為參加者補給（據講直頭有軍用車輛拖部運水車上山），所以補給對毅行者嚟講一直都唔係問題。到回歸之後，毅行者由樂施會接手主辦，當中有唔少團體義務幫忙（我最深印象係每年負責急救嘅公立醫院醫務人員），咁多年都畀唔少信心各位參加者，大家絕唔會驚無水飲無嘢食，差在大家咀刁，嫌食麵包太寡啫。

噢，講遠咗，講返補給先。

毅行者十個檢查站，都必定有飲有食。當中一定會提供嘅，就係食水、麵包、熱湯同熱飲。而特定嘅檢查站，又會提供唔同嘅補給。其實大家去樂施毅行者官網就一定搵到，不過我就Cap畀大家睇下啦：

除咗上面嘅官方補給外，鴻福堂舊年喺基維爾營有派熱湯派燒賣，今年亦會再接再勵，大家食gel飲寶礦力搞到口寡寡，啪粒燒賣真係精神為之一振！6號檢查站嘅烏冬同飯團，都係令人期待。

注意事項：

1. 為求環保，除咗CP1大浪西灣外，大會唔會派發樽裝水。參加者一定要自己帶水壼或水樽

2. 有啲食物係有限數量（如第四站嘅燒賣，第六站嘅烏冬），先到先得。遲到食唔到，就唔好投訴

3. 理論上，檢查站有食水麵包熱湯熱飲，只要你食得落你食幾多都得。有朋友就全程用官方補給，唔搵外來補給，作為挑戰嘅目標。

4. 2016年最新安排，大會喺各個補給站，將不供應紙杯，請各位自備水杯裝水

5. 珍惜食物，切勿浪費；

毅行．傳承
Fitz.hk為樂施毅行者2016大會媒體伙伴

樂施毅行者官方網頁

更多:
Fitz.hk Facebook專頁
[Fitz毅行者2016] 唔識死新鮮人 挑戰麥徑100公里
[毅行備戰] 系列
Fitz Hiking 行山