人人要帶嘅裝備都唔同架,千祈唔諗住按圖索騎。
人人要帶嘅裝備都唔同架,咪諗住按圖索驥。

踏入十月,毅行之戰可謂如箭在弦,係時候為備戰作最後準備。而呢個時候,大家真係要預備好當日作戰嘅裝備。以下裝備,真係要一早試清楚,到時發覺唔啱用,都未必可以即時買得切:

1. 背囊
大家練咗咁耐,一定已經搵到個最啱自己嘅背囊。呢個時候,就試下將你諗住要帶嘅物資放晒入個背囊入面(連埋水),然後孭上身喺屋企行幾轉(甚至落樓跑幾步),睇下會唔會太重或者太累贅。仲有就試下邊行邊拎嘢,睇下順唔順手。

呢個時候,要買個新嘅背囊然後用舊佢其實都仲趕得切嘅,我自己揀毅行背囊嘅原則,就係「伸手可及」(唔使除背囊都拎到常用物資)同「可大可小」(有足調大小較嘅背囊帶)。總之,要盡快確定你嘅作戰背囊啦。

2. 鞋
唔理你著行山鞋定係著跑鞋,你應該要喺你嘅鞋櫃選出當選佳麗。最好就係一對用嚟行1至8段,再揀對跑鞋用嚟跑9至10段。當然,你講究啲仲可以揀多對落雨著嘅鞋。不過最緊要嘅係,就係要將對新鞋快啲著舊佢,以免到時刮腳呀!

3. 衫褲襪太陽帽毛巾
諗定到時著咩衫,十一月天氣會變涼(2009年毅行當日大帽山錄得0度),預定長袖衫同長褲。記住,所有衣物都要著舊啲先好著去毅行呀。


4. 能量食品
無論係energy bar或者gel,都要事先食過,睇下啱唔啱自己口味之餘,仲要睇下自己腸胃受唔受到。真人真事,有人行29個鐘,食咗3包gel,一包可樂味,一包士多啤梨,一包橙味,結果一到終點,啡、紅、橙三色嘅gel,原包嘔番出嚟!

仲有就係,一確定自己諗住帶咩能量食品,而家好快啲去掃貨。有年毅行前一晚,我行勻成個旺角都買唔到一條bar,一包gel呀!有人連保礦力粉都買唔到呀!

5. 頭燈電筒
呢個時候,你應該操過夜山,嗰陣應該試埋你支頭燈或電筒。未有機會試新嘢,不妨喺屋企開著佢哋放一晚,睇下夠唔夠電。說明書話佢頂幾多百個鐘,但到時又無電,你去搵消委會都幫唔到你啦。

6. 水袋水樽
新買嘅水袋或水樽,試下放落背囊睇下順唔順手,亦要熟習下點用佢哋嚟飲水同補水。(唔好笑我呀,有啲水袋我真係唔識得點加水!)

7. 物資清單
趁仲有時間,就好好預備一份物資清單。由食物飲料衣服鞋襪,以至個人衛生用品藥物。有咩要補充就快啲添置。據講毅行前幾日,有人已買唔到凡士林同黃道益……

毅行.傳承
Fitz.hk為樂施毅行者2016大會媒體伙伴

樂施毅行者官方網頁

更多:
Fitz.hk Facebook專頁
[毅行備戰] 系列
山雞@Fitz.hk
Fitz Hiking 行山

廣告
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。