圖:健行之友
圖:健行之友

[按:「毅行備戰」呢個系列,想將毅行者嘅基本資料重新整理,山雞希望可幫到各位毅行新手啦。各位如果係毅行老手,亦歡迎同大家分享你行毅行者嘅經驗。]

支援隊準備嘅食物,肯肯定能夠激起毅行隊伍嘅鬥志。而好多熱心嘅支援隊,會花盡心思提供美食。不過,毅行者活動始終有時間限制,各位參賽隊伍嘅食物,味道未必係第一位,反而要注意以下各項:

1. 唔使點咬
一般隊伍會在支援點停留不足半個鐘。又要換衫梳洗,又要執拾行裝,食嘢嘅時間隨時得幾分鐘。食得咁急,就算支援隊好心整隻咖喱蟹都食唔切啦!

2. 易入口
無論係自製或者外賣,有支援都會專登搵個保溫壼入起啲食物,希望隊伍可以食到熱辣辣嘅補給。不過,得嗰十分八分鐘,毅行隊伍已經行到身水身汗,仲要對住碗熱到出煙嘅食物,就真係唔知點放入口咯。(2009年寒風下嘅毅行者另計)

支援點食啲乜
鉛礦坳Checkpoint有杯麵供應。圖為歌手鄭融做義工。

3. 鹹味為主
毅行隊伍行咗十幾廿個鐘,飲水飲能量飲料真係口淡淡。呢個時候,最好有啲重口味啲嘅食物。我個人就一定唔會再食詌嘢。

4. 少醬少汁為佳
隊伍到達支援嘅時間,絕大多數都會有遲無早。而支援隊成員盡本份,亦會提前到達。所以,除非食物係即到即煮,否則拎去嘅外賣都會隔一段頗長時間(閒閒地粒幾兩粒鐘啦)。我山雞就絕唔介意食凍飯,不過如果啲飯嘅醬汁「瓊」到一pat pat,就真係令人反胃囉。

5. 以高熱量為主
我唔知有無人會勇敢到喺毅行期間,仲實行斷食、戒碳水化合物呢啲減重計劃。正路嚟講,毅行咁大運動量,應該食多啲高碳、高蛋白嘅食物。

嗱,食飯食到坐都無得坐,都咪話唔趕。
嗱,食飯食到坐都無得坐,都咪話唔趕。

根據以上原則,再加本人口味,有以下推介:

  1. 薯仔肉碎湯:易入口,高熱量,易煮,擕帶方便。
  2. 烚雞蛋:超級毅行者最愛,超豐富營養,一口一隻,以便迅速趕路。
  3. 燒味飯:我呢個飯精,食少餐飯真係會腳軟軟。燒味飯好在無醬無汁,又易買到,唔使支援隊四圍撲。
  4. 頽飯:呢度指餐肉、火腿、煎蛋、腸仔等嘅碟頭飯。咪以為hea,有肉有飯,足夠應付毅行所需。
  5. 炒飯:連夾餸都唔使,仲唔夠易入口?
  6. 白粥:粥水易入口,又唔會乾啃,非常受歡迎。注意係唔好買粥舖嘅有味粥(如牛肉粥、皮蛋瘦),因為太多味精,食完易口乾。

毅行開飯01

補充一下,有啲食物我就唔會叫支援隊準備:

  1. 辣嘢:行咁多路,咁耐無訓,腸胃一定唔好。仲搵刺激性食物搞佢?咪玩啦。
  2. 麵包:就算係老麥、熱狗,我都可免則免。10個Checkpoint都有麵包提供,仲食唔夠?
  3. 粉麵:之前講過,支援隊準備嘅食物,隨時要攤幾個鐘,麵餅隨時變麵糊。
  4. 炒粉麵:擺得太耐,啲油出晒嚟,更何況嗰個時候唔好食得太油膩囉。

更多:
Fitz.hk Facebook專頁
[毅行備戰] 系列
山雞@Fitz.hk
Fitz Hiking 行山


文章為作者意見,不代表Fitz立場。

歡迎投稿: http://fitz.hk/contribute/

山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。