[毅行備戰] 11件必須測試的裝備

如果你毅行中籤，由而家開始計仲有幾個月去操練，而其中一項操練要點，就係測試你嘅裝備。

古語有云：「屎波架生多」。我山雞操得少，就梗係要倚賴裝備嘅幫助啦，以下呢啲裝備，而家買定試定，呢幾個月可以試下啱唔啱自己用：

1. 背囊：以輕便、貼身為合適，及放得落至少2公升水，尤其炎夏操練一定要補充足夠水份
2. 鞋：唔一定係專業級行山鞋，跑鞋(有防滑)亦可。最好夠輕，保護性強，防唔防水反而係其次
3. 水壼/水袋：兩樣都得，視乎個人習慣，唔好再飲樽裝水嘞
4. 毛巾：夏天操山一定要有佢
5. 頭燈/電筒：毅行者一定遇到天黑之時，早啲買定，可以熟習使用方法，夏天亦適合操夜山
6. 行山杖：對於麥徑嚟講，可用可不用，不過用行山杖都要得其法，唔識反而會阻住你
7. 襪：有人鍾意厚，有人鍾意薄，有人鍾意一厚一薄著兩對襪，操練時試清楚自己喜好
8. 帽：以遮到後頸嘅帽最好，事關每次唔戴帽操完山，最痛嘅地方就係曬紅咗嘅後頸同上背
9. 衫：唔係等樂施會件大會Tee呀嘛？揀幾件靚嘅行山衫用嚟操練著下啦
10. 褲：唔好睇少條褲，褲散熱唔好，你會辛苦十倍！麥徑唔使剷林，短褲亦可，甚至跑褲都係好選擇
11. 內衣褲：最貼身，亦係最緊要

    

以上裝備，當然係「輕便、快乾、易打理」為最佳，而我山雞每次添置裝備時，都會嚴守一個原則：「呢個世界無multi-tasking！」多用途嘅嘢，反而唔會面面俱到。參加得毅行，就一心一意揀啱用嘅裝備，如果唔係，搞到活動前先發現唔啱使，好可能會得不償失！

更多：
Fitz.hk Facebook專頁
[毅行備戰2016] 如何挑選你的隊友?
[毅行備戰2016] 抽籤派彩係戰鬥開始!
跟住矛盾去「毅行」
Fitz Hiking 行山