[毅行速報] 組織你嘅支援隊仲有不足10日就踏上毅行之路,竟然仲聽到有朋友上網問Facebook大神,雪地裸求毅行支援隊。我山雞一問之下,原來有人連支援隊有咩作用都唔係太清楚(其實,大家拎咗選手包之後,唔好淨係睇下有咩coupon,都要搵時間睇下本參加者手冊)。 簡單講,支援隊嘅作用係:

1. 食物支援
樂施會每個檢查站都有充足嘅食物以及熱飲畀你應付身體所需。不過10個檢查你要食足10次麵包,就未必人人覺得係樂事。支援隊其中一項最重要嘅功能,就係送飯送粥,等毅行者可以喺食物方法得到滿足。

2. 物資支援
你唔一定要換衫換鞋,但有支援隊幫手拎物資,你就唔使拎住幾粒後備電池行足100公里,又唔使全程帶晒所有Power gel喺身。當然,到時到候有人拎牙刷畀你刷牙,拎毛巾畀你洗面,你會都相當過癮。

3. 精神支援
我好記得每次行毅行過咗畢架山之後,總會一口氣衝到城門水塘,有時連CP 6金山個檢查站都唔想入。原因係上畢架山通常係深夜,行到城門水塘啱啱朝早,就可以品嚐支援隊送嚟嘅熱粥熱飯,簡直令人精神為之一振。除咗物質令精神得到滿足,朋友之間一句加油,亦同樣窩心。

4. 擴散病毒
仲有就係,拉多啲人落水,就可以加速擴散毅行病毒,多啲人醉心毅行,山野間更多同好者,更多人支持樂施會。


當然,時候緊逼,不過而家都仲趕得切組織你嘅支援隊。喺上山操練之時,其實呢樣嘢都好緊要。

更多:
[毅行速報] 最後的備戰階段
[毅行備戰] 官方補給站有咩提供?
[毅行備戰] 支援點.逐個點
毅行者@Fitz.hk
Fitz Hiking 行山

廣告
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。