[膠嘢公園] 曾小強：郊野石屎化的5大問題

早幾日，有山友跑過屯門山頭，發現有幾十級鋪上健身軟墊嘅梯級，引起強烈迴響，有人大嘆政府「阿茂整餅」，無嗰樣整嗰樣。連日來喺各方面嘅壓力之下，漁農自然護理署終於對呢幾十級「硬膠梯級」有回應了：

1. 呢啲軟墊一共有30塊，原係健身設施所用。
2. 鋪墊原因，係自從2014年呢度起咗石屎梯級之後，有人話梯級太硬，所以鋪膠墊保護行山人士雙腳。
3. 署方強調，呢啲膠墊「防滑」、「吸震」，以及「保護水土流失」。
4. 呢30級「硬膠梯級」屬試驗性質，未有計劃喺其他地方推行。

山友有咩反應？喺一個電台節目入面，有師奶聽眾就話：

「啲膠墊畀太陽曬到發出臭味，我帶住兩個小朋友行到氣來氣喘，去到嗰度係咁吸係咁吸，我真係驚佢哋吸完呢啲臭味有病呀！」

行山都係為咗身體健康啫，點解仲搞啲化學嘢嚟污染環境兼身體呢？

而「郊遊徑石屎化關注小組」發起人曾小強強調，政府其實一早唔應該喺郊野地方舖石屎路。如今又話石屎路令人行唔舒服，咁又墊多層膠墊，根本係多此一舉。

曾小強話：「石屎山徑就等如幫個山頭著咗件雨衣，雨水唔可以經泥土透落地下，而要由石屎樓梯兩邊排走。於是乎，山頭嘅水土流失就此而起！」

曾小強補充，將郊野地方「石屎化」，會帶來5大問題：

1. 石屎建造費用較其他方法為高，浪費公帑；
2. 石屎較為吸熱，行人時較為辛苦；
3. 石屎山徑不能吸收雨水，雨水要由山徑兩旁流走，引起水土流失；
4. 趕絕山徑上的小動物、小昆蟲；
5. 有物理治療師指出，石屎樓梯傷膝，亦比泥路更易拗柴。

有人話：「咁石屎路可以方便大家去郊野遊行丫嘛。」

曾小強反駁話，其實市民大眾到郊野地方都應該要做足準備，包括帶水、制訂路線，以及穿著合適裝備 (如行山鞋)。事實上，大多數行山意外都係起於市民準備不足。所以小強話：

「你話要起啲石屎路去方便市民，不如用啲資源去教育佢哋正確嘅郊遊態度先。」

7月16日，曾小強連同「郊遊徑石屎化關注小組」將舉辦「石屎山徑導賞遊」。

活動詳情：
日期：7月16日 (星期六)
時間：早上9時
集合地點：沙田上禾輋路1號沙田政府合署民政署
活動流程：會先向民政署遞交請願信，然後再一齊慢行至正進行石屎化工程的「道風山」進行實 地考察。

查詢：石屎山徑導賞遊

人稱「越野跑山王」嘅曾小強，因乜事唔練跑去關注石屎山徑問題？下一篇再講。

更多：
Fitz.hk Facebook專頁
[山友傳奇] 鵬哥失踪兩日的奇幻之旅
[郊野石屎化] 你揀木櫈定石屎櫈?[行山友剋星] 石屎山徑一條都嫌多
Fitz Hiking 行山