4月9日《蘋果日報》: 下午4時許,一名女子與朋友到東壩郊遊,其間女事主從近海的圍堰壩行走,至盡頭位置時越過警告牌,之後攀過多個防波堤上的錨形石,沿崖邊行上山,大約20分鐘後失足墮崖,身上多處受傷,飛行服務隊 (GFS) 到場將女事主吊起,並送往東區醫院搶救,延至晚上7時搶救不治。

Fitz當晚收到 Halu – 人生就是不停的訓練 的訊息,原來當日 Halu 與朋友在花山進行攀登訓練,與這兩位發生意外的女子不期而遇:

「我同朋友喺下晝四點幾喺檢豬灣再前面兩個灣遇到呢兩位女士,當時見佢哋咩裝備都無,已經覺得佢哋好危險。有同伴正想勸佢哋離開,點知轉過頭已經見到其中一位女子由50米嘅懸崖跌咗落嚟……

因為嗰個位我哋收唔到本地電話網絡,我哋唯有兵分兩路。我跑出去報警,另外有朋友用攀山繩去解救企喺懸崖嘅女士,因為佢企嗰個位好危險,而且佢嘅朋友跌咗落去,有少少失控………我跑咗大概1.5公里先收到電話,好快已經有直升機到達將傷者救出。」

不要輕言綑邊 

對於意外經過,大家都不願多提,只希望大家藉此可多注意戶外活動的安全。

與 Halu 一起目睹事發經過的香港攀岩嚮導 Jun Leung,對事件深表遺憾,他告誡市民不要隨便進行綑邊活動。Jun說:

「喺網上,或者啲報紙雜誌都成日介紹咩秘境靚景,而介紹嘅路線未必清楚。結果搞到好多人因為咁而行咗啲佢哋駕馭唔到嘅山徑。綑邊就係其一個唔少人忽略咗嘅危險地帶。」

Jun 提醒,綑邊活動要涉及全面的登山知識,亦要對地型、地質有相當認識。當中除了要避免跌落海遇弱,亦因沿海地質較為鬆軟,要注意岸邊的落石。

因此,Jun 強調:

「應該要學識攀石,先了解天然場地攀登的技巧,然後先去參與綑邊活動!」

更新: 甚麼是「綑邊」? 資深傳媒人兼行山愛好者區家麟如是說:

「綑邊」,即是有郊野公園家樂徑你不走,沿海岸線石灘而行,地圖無路無標示,能否通行亦不知,有時遇巨石、懸崖,要一鼓作氣,徒手攀爬;有時實在太危險,只能原路折回;有時潮漲淹石,更要落海涉水而過。

潮池《綑邊行》

綑邊需要基本的攀岩裝備,但最重要就是要對攀岩有認識。

至於綑邊裝備方面,可分為兩方面,一是方便攀登的器材 (例如繩索),另一方面是安全裝備,包括頭盔、攀石粉、安全帶等。

Jun補充,不少沿海郊遊地方,往往令人誤墮綑邊阱陷。除了萬宜水庫花山一帶,還有:

大家到海邊遊玩時,緊記不要偏離正規行山路線,以身犯險。

Fitz 編輯部
我哋坐唔定、無時停,唔做運動唔舒服! 只要係有用知識、重要資訊,以至好玩話題,Fitz都會全力搜羅,同時鼓勵「郁民」齊齊參與,打造一個開放嘅運動生活資訊平台。