後: 作者潘潘;前: 何亨

完走一個100唔容易,半年內完走第二個100,我需要啲時間消化下一個100。

返到終點,隊友何亨問我一條幾乎必問既問題:「下年仲玩唔玩?」激動既我當時既回應係:「呢一刻,我答唔到。」兩次毅行加一次韓毅(CP5剪左帶)後,我都即時答到:「我會再玩。」呢幾日,我就認真咁回顧左一下……..

第十、九段:

由石屎路轉入山林路果個位發生左塞車奇景,不過由於大會分左預計完成時間起步區,快腳應該快快上到山。之後既路係水塘路同上斜落斜路,上斜慢行落斜 jog,輕鬆完成。

第八、七段:


上大帽山波波,之字路上望雲海望山,真「向高山舉目」好靚! 好快上左大帽山又好快上左草山又好快上左針山,整體呢段路係比順走易左既。而我就明白到賽前無加碳既後果,體力消耗得好快,仲有無剪腳甲既痛苦,上年記得提人,今年唔記得提自己,真係要俾「黑豬」自己。

第六、五段:

去到獅子亭見到HNR既支援隊,見到朋友既喜悅我係唔識形容,有飯食有指甲剪,有陪行仲有攝影師影相! 行左一半,我好似領略到毅行先生KK所講「行左一半要好似無行過咁」既智理名言。

第四、三段:

逆走原來難既路段在後頭,雖然好快上到雞公山,但對腳累積左六七十K數,再碎石落山上山,呢段又多數是夜晚,睇唔清路又眼訓,對腳經常撞石頭,真係幾沮喪。好彩有朋友來陪行提供精神同體力支援係好幸福既事,仲幫手揹背囊,又幫手按摩鬆腳,好有義氣,好滾動。

第二、一段:

終極惡魔,西灣山,上極都仲有,每次又見到樓梯,個心就沉一沉,對腳已經好攰好攰,上級落級都係呀婆上身,真係有淚都吞返入去,不斷催眠自己好快到,就快捱到終點。終於,望到了,望到了這條最熟悉既石梯,落到去就是東壩CP。距離終點,仲有10K左右既石屎路,心知跑返去都….唔易,決定用急步上斜慢跑落斜KO埋最後一段,最終,返到終點忍唔住喊出黎慶祝自己完走一個100。

另外:

  1. 原來早鳥優惠會送 buff 既帽,當日見到人戴好靚好葡萄
  2. 賽前送 T shirt 完賽送背心同喇叭,未試過拎住咁多野離開麥徑
  3. 各個CP都有大量野食:杯麵,麵包,餅乾,重要有可樂飲,好滿足
  4. 最記得係扶輪公園既 cheering team 有老友記有小朋友,唔記得係咩團體但成件事,好有愛。仲響呢個CP見到個學生做義工!
  5. 各個CP既義工都好識搞氣氛,好supportive ,特別係CP6!
  6. 響CP8想飲熱茶,估唔到係成個茶包擺落杯度沖,好有茶味好幸福好奢侈

淨係以上幾點,我好似都有答案了….

整段逆走,走得有歡笑有汗水又有淚水,遇到好多山界勁人,山界學者,山界主席,um….咁我下個目標係咪要挑戰圖騰跑?

有一班行山友叫「獅子山」Facebook 專頁

Fitz 文章連結: https://fitz.hk/?p=90678

更多:
Fitz Facebook專頁
[逆走100 Rebel Walker] 100公里完走全紀錄
Fitz 行山 Hiking

廣告