印咗平平無奇打氣口號嘅港產蒸餾水,無緣無故被下架,#香港真係好靚 竟然成為敏感詞,作為一件與香港共存亡,一生鍾情香港嘅蛋散,絕對嚇得啞口無言。

如果香港唔靚,風景唔值得欣賞,點解有關政府門又搞咁多花臣,都要吸引市民山長水遠走入郊野欣賞風景呢?

破邊州豪花千萬

最新一單由行山網站 綠洲 Oasistrek 踢爆,話漁護署同建築署,搵咗幾個建築專業團體徵求設計作品。於西貢破邊洲興建觀景台,預算高達1,000萬。

依照比賽網站所講,設計包括於萬宜水庫東壩至花山東面,興建三座觀景台及拍照地點,以方便遊客欣賞東壩、破邊洲,以及撿豬灣 (又稱響石灘),觀景台之外亦會於沿路增加指示牌、座椅、欄杆、梯級等設施。

綠州呢單料爆出後,全城各個行山群組、郊野關注團體都為之譁然。事關1,000萬預算,意味住要大興土木 (唔係承建商又開到咁大張單),不過破邊州呢處屬世界知名地質保護區,靚景之所以係靚景,就係因為純天然,無添加,並非人工合成嘅「造美人」。

大上托嘅石屎瘡疤

圖: Concern Group on Concretization of Hong Kong Natural Trails 郊遊徑石屎化關注小組
今年4月,關注本地郊野發展嘅組織 Concern Group on Concretization of Hong Kong Natural Trails 郊遊徑石屎化關注小組 揭發喺井欄樹附近嘅大上托,突然被土木工程拓展署改建成石屎梯級。工程屬於安達臣石礦場嘅發展工程,用意係方便市民去大上托山頂觀景。

以政府部門嘅邏輯,發展即係大興土木 (甚至懷疑有人砍伐樹木),山野面貌難以復原。

其實近年呢一類「先破壞後建設」嘅郊野工程著實不少。好似話大浪西灣觀星台,好地地一個世界聞名嘅沙灘,起咗幾張「安樂椅」畀市民睇星。要睇星,大家瞓喺沙灘就得。

我屋企嗰個係丫烏婆

問番之前嘅問題:「如果香港郊野嘅風景唔靚,政府點解要起咁多設施,去市民欣賞呢啲靚景呢?」呢個時候,我諗起我死咗好多年嘅表叔公。

表叔公係老粗一名,每講一句嘢都有幾個字係粗口,佢成四十幾歲人識咗表叔婆,拍拖幾個月結埋婚。喺表叔公眼中,表叔婆又後生又靚,但表叔公無周圍認威,反而同人講:「我屋企嗰個係丫烏婆」。我老豆解釋,呢招叫釜底抽薪、禾稈冚珍珠,你越愛一樣嘢,就會越去諗盡辦法將佢收收埋埋,老婆係咁,金銀財寶亦係咁。

哦~~~ 原來一切只為愛。政府搞咁多嘢,都係要掩飾香港嘅靚景……

(呢個時勢,好多嘢都曲直難分。)


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 香港真係好靚,點解要人工破壞佢?