四年前嘅2016年，本地掀起行山熱: 大東山多人過旺角；「行山女神」著 bra top 教人上蚺蛇尖；潮流雜誌推介行山資訊，話鴨脷洲玉桂山係「親子路線」; Facebook 有行山群組一個月增加3萬會員，群主山界天皇話要一統江湖……
當時，有個叫 Joyee 嘅柔弱男生每星期出片，標題都係「X分鐘行《XX山》」。短片雖然得一兩分鐘，但佢就要孭住部大相機，親自上山行幾粒鐘，返到屋企又要剪片、配樂，同埋開埋金口扮谷阿莫講旁白。
幾年落嚟，bra top 女神銷聲匿跡，山界天皇仲未稱霸，不過 Joyee 仍然繼續有片，佢仲寫咗本書《行山動畫廊》，整咗個手機app “Joyee Walker” (iOS | Android)，最近仲開咗間行山用品舖。
一切由盲舂舂開始
Joyee 決定開舖頭，原來同佢一次慘痛經歷有關。
「我拍片之前已經好鍾意行山，但對行山唔太認識。有次去買行山鞋，只係聽個店員介紹，就嗰對鞋『一定唔會搧』，點知著咗一次中晒伏!」
「到我拍咗片之後，好多睇過我短片嘅觀眾都PM我，問一啲買裝備嘅嘢，咁我覺得出面無乜舖頭會幫客人解答呢方面問題，就不如自己搞間舖啦。」
Joyee 呢間舖叫 JW Shop，佢盡量為店舖上架嘅每件貨品，拍一條開箱文，等客人可以初步了解各種裝備嘅選擇，然後先上舖頭購買。而佢當然會坐鎮店舖，為客人解答問題。
我真係好鍾意行山
呢4年以來，Joyee 似乎將所有時間、金錢都投入去搞行山短片、行山app，而家仲晉升為「店主」，咁佢有幾鍾意行山?
「我其實係一個好內向嘅人，唔太鍾意公開表達自己。去郊外既唔使接觸好多人，又有機會可以一個人整理自己嘅思緒，可以諗好多嘢。我自己咁鍾意行山，希望有更多人可以參與其中，所以先會去拍片、寫書同埋搞個手機app。」
開舖絕對唔係 Joyee 嘅終極目標，佢更希望可以推廣本地行山文化，令更多人鍾愛香港郊野，從而令政府，令當權者喺制訂政策時，都可以顧及大家對香港郊野嘅期望。
JW Shop
電話／Whatspp: 5744 2214
Email: [email protected]
開放時間
- 星期二、五 12:00 – 21:00
- 星期六、日 12:00 – 19:00
為何要運動？去公園看看那些四五歲的小朋友，從跑跑跳跳所得來的喜悅吧！勿忘初衷，運動會令人快樂，難道我們都忘記嗎？
