一年容易又毅行不忘獅子山精神 (邀請新隊友)

由

2019-04-18

Fitz > 運動 Sports > 行山 Hiking > 一年容易又毅行不忘獅子山精神 (邀請新隊友)

接觸毅行者呢個活動十幾年，人來人往，有人玩一次不再回頭，有人玩完又玩帶完又帶，甚至聚咗班人出嚟，我講緊我哋:「獅子山精神隊」。

入正題，嗌「人生應該玩一次XXX」呢種口號容易，真係實踐就唔容易，有人唔練膽粗粗上，用最痛苦嘅方式去完成，有人個個星期最少50KM咁練，跑入20個鐘100KM。24小時同48小時嘅距離係以光年去計，喺精神體力嘅臨界點交煎嘅獨特體驗對新手嚟講就係人生應該試一次。

7/5 樂施毅行者又抽籤，獅子山精神隊繼續呢幾年嘅目標

帶領未完成過100KM麥理浩徑嘅參加者進行「初體驗」(以30至48小時完成為目標)
以山會友，四人八腿一條心，行一次記一世，齊人完成比最佳時間重要
歡迎曾經/現在受情緒或精神困擾加入或成為支援隊，由不運動到培養習慣

現開放6-9個空位，邀請有意參加人士聯絡我law少: [email protected]

留下姓名、電話、簡略行山經驗及目標，再作安排 (預計分配為三隊，每隊至少有一位有完成經驗做隊長)

以下集合幾位隊友們毅行前後的感言，共勉之。

Gracie: 參加2018年毅行者源於17年開始同朋友郊遊行山，喺山上見到各大小比賽嘅參加者非常羨慕覺得好鬼厲害又好鬼型。直到17年尾喺毅行者擔任終點義工，嗰刻下定決心下年我一定要成為其中一位參加者。2018年下了非常多努力由一個喺運動場跑兩個圈要搭巴士番屋企嘅人一步一步到參加圖騰、雷利、毅行、HK100，逆走，呢個過程好老土地証明咗只要夠堅持同毅力無嘢係無可能。如果我可以，你都一定得!

Clement: 年屆三十，很想做一件令自己多年後值得回味的事，而令我有深刻印象之一二事情，非麥理浩徑莫屬。

1-10段 (100公里路程)，踏足前從沒想過自己會有完成的這一天，過程讓你體會到人每每遇到爭時需要自我溝通，不妥協下重新說服自己前進；在路途中，了解到每個當下即將成爲過去，過程要做的反而不是想如何及什麼時間完成；反而腳踏實地，好好享受當刻步伐才不會錯失一期一會的風景。

走過大自然的高山低谷，發現自己原來相當渺小，但你的心能做就你不一樣的耐性與意志。論行山或跑步也好，它們讓我發現更好的自己；將過程學習到的態度放諸在生活上，會有很大得著。

鈞: 第一次毅行或者只係一時衝動既決定，行得咁辛苦，休息得咁少究竟係為乜? 對我黎講，係一次無悔既經歷，100公里唔單止係自己要走既路，仲係同隊友一齊經歷既旅途，完成挑戰除左得到滿足感之外，仲有一段段難得既友誼。至少我覺毅行係人生入面至少要走上一次既事。

Grace: 第一次行完100公里得到嘅神奇力量就係－100公里我都行得晒，生活上有幾難嘅事，都會捱得過。唔駛驚行唔晒，因為肯練嘅其實無想像中咁不可能；唔駛擔心100公里好難行，因為佢真係唔容易，但行一次真係記一世。

有一班行山友叫「獅子山」Facebook 專頁

Fitz連結: https://fitz.hk/?p=117816