得罪講句，「行山」呢個活動，以前係俾人一種「老土」嘅感覺 — 佢既係晨運嘅好選擇，亦係大班人假日消閒之選。簡單一句，上山落山嘅大部份都係上咗年紀嘅人士，後生仔唔多會去行。不過大家都知，呢個情況近年出現180度轉變，行山已經成為熱潮，每逢秋冬嘅周末，香港各大熱門山頭都人山人海。老老實實，大家仲記唔記得，呢股熱潮係幾時開始，之後又會點? 一齊搵 Google 大神出嚟問下啦!
1. 大包圍類 (行山、麥理浩徑 、行山路線)
2. 熱門類 (大東山、鶴咀、玉桂山)
3. 難度/意外類 (吊手岩、鬼手岩、自殺崖)
4. 裝備類 (行山杖、行山鞋)
5. 相關類 (露營)
Google Trends (Google 趨勢) 係 Google 大神提供嘅免費服務，可以俾大家 search 到唔同搜尋字詞過去嘅熱門程度，我哋就入咗啲行山相關嘅 keyword 入去，有啲圖真係好睇過騰訊。(全部按圖可放大)
大包圍類
keyword: 行山 (10年圖) (上)
2014年開始穩步上揚，到2016年秋冬真正爆升，呢一張圖，基本上已經講晒……
keyword: 麥理浩徑 (10年圖)
相對平均，都係2016年見頂
keyword: 行山路線 (5年圖)
又係明顯2016年係最高位，2017會唔會破頂? 暫時已有回落跡象….
熱門類
keyword: 大東山 (5年圖) (上)
心電圖咁款，上大東山睇芒草，真係變咗每年例牌? 不過留意，每一年高位都比上一個低，熱潮係慢慢冷卻緊。
keyword: 鶴咀 (5年圖)
同大東山唔同，鶴咀嘅熱門搜尋程度，係喺2016年大爆發，唔怪得上年咁多垃圾。
keyword: 玉桂山 (5年圖)
比鶴咀爆升得更恐怖，關唔關東張西望事? 仲記得舊年非常塞人……
難度/意外類
keyword: 吊手岩 (5年圖) (上)
一直唔算多人 search，2017年3月消防員吊手岩殉職事件，令佢成為全城焦點
keyword: 鬼手岩 (10年圖)
10年前無乜人 search，到2016年開始，越嚟越多人提，今年的確聽到好多人打算出團/已經去咗，Google 條虛線亦預期「鬼手」嘅熱門程度，將會有增無減。
keyword: 自殺崖 (5年圖)
今年真係好多人去自殺崖，不過熱門程度爆升，同早前發生嘅奪命意外好有關係。(一線生機、狗牙嶺亦有相似情況)
裝備類
keyword: 行山杖 (10年圖) (上)
又係2016年秋冬做咗個頂，大家一窩峰去郊遊，發現體力不繼要買杖? 又真係幾合理。
keyword: 行山鞋 (10年圖)
難怪香港咁多行山舖越做越大，睇埋下張「露營圖」你更加明白
相關類
keyword: 露營 (10年圖) (上)
真係騰訊股價圖咁款，2016年去到頂，2017有無機會突破? 好睇天氣。
小總結
睇完咁多幅圖，基本上可以得出一個結論，2016年係香港行山熱潮嘅頂峰，所以各個山頭人山人海，引發安全、環保、公德嘅問題，絕對係有得解釋。問題係，之後點? 如果睇 Google 嘅搜尋趨勢，香港行山熱潮的確有冷卻跡象，又或者，當大家行過所謂嘅「新手路線」，會繼續嘅，就會去發掘更高難度嘅山徑去挑戰 (如鬼手岩)，而呢個趨勢，未必再係簡單就顯示出嚟。
不過正如前文《[半年7宗奪命行山意外] 在山上不要心存僥倖》所述，會發生嚴重意外嘅，通常都唔係新手，因為佢哋往往以為自己有經驗，所以掉以輕心 (例如「行澗高手獨行發生意外」呢類似新聞，真係聽唔少)，無論你想挑戰咩難度，幾時都要做足準備，注意安全。
各位有興趣，亦可到 Google Trends 自行輸入關鍵字搜索，歡迎分享有趣發現。
更多：
Fitz Facebook 專頁
[半年7宗奪命行山意外] 在山上不要心存僥倖
[秋冬限定] 漁護署紅葉情報 (附9個賞紅葉勝地)
5條行山群組的月經問題 (附實用答案)
Fitz Hiking 行山
