城門水塘主壩驚見CCTV Big Brother is watching you?

有朋友傳來多張相片，顯示城門水塘主壩，安裝咗一部攝錄鏡頭 (CCTV) 。

CCTV 安裝喺城門水塘紀念碑上方，呢度係衛奕信徑第七段同麥理浩徑第七段交匯點，山徑四通八達，可通往金山 (深水埗)、下城門水塘 (大圍)，甚至可經針山、草山至沙田、大埔，以至經龍門郊遊徑往元朗。喺呢度安裝CCTV，是否與早前塗污事件相關 (見下文)，還是另有目的?

連郊外地方都有CCTV，令人聯想到小說《1984》: “Big Brother is watching you”。

至於 CCTV 幾時安裝，邊個部門安裝，市民無從得知。一般公眾地方嘅 CCTV 都有告示，不過呢一部就無。

城門水塘紀念碑

CCTV 所在位置「城門水塘紀念碑」，係香港僅存兩塊水塘紀念碑嘅其中一之 (仲有一塊係大潭水塘)。紀念碑簡單記錄水塘嘅興建嘅時間 (1935年至1937年)，以及水塘存水量。城門水塘紀念碑於2009年列為古蹟。

但自從早前被人塗污後，紀念碑前面嘅水馬並無移走過。

紀念碑資料: 古物古蹟辦事處