[大棠紅葉] 一窩蜂打卡前 請顧及居民感受

每年12月都係大棠嘅紅葉季節，家陣10月過咗唔夠一半，已經有人於 Facebook 地區群組問紅葉情況。帖子一出，隨即引來當區居民極大迴響，有居民話:

• 「大棠居民最憎聽到呢句嘢。」
• 「上次打風啲樹冧晒。」
• 「無，呢一世都無。」
• 「平日大棠塞車，假期更塞，多謝推動大棠旅遊的人。」

交通問題令居民苦不堪言

唔知呢位街坊真心定假膠，不過事情顯示，當郊遊熱點配套不足，旅遊士人同居民就容易出現衝突。元朗大棠有多條原居民村落，近年亦有由地產商發展嘅低密度私人屋苑。不過，大棠交通網絡受制於地理環境，只有一條雙線雙程馬路來往元朗市中心，所以平日居民已飽受塞車之苦，12月至1月紅葉季節，情況就更為可怕。

同樣地，西貢居民亦出現同樣情況。喺行山及遊船河旺季，大批遊客湧入西貢，嚴重影響居民進出，巴士小巴逼滿遊客、食肆爆滿，唔少居民甚為不滿。

此外，下白泥塞滿影日落嘅市民，鶴咀路口嘅違泊車輛，好多時亦好影響當地居民。

下次計劃去大東山睇芒草、去大棠睇紅葉、去鶴咀打卡之前，可以先顧及一下當區居民情況，例如盡量使用公共交通工具，甚至步行前往 (如下白泥)。

一句到尾，我哋一窩蜂，居民好痛。