人大就老土，當初點解諗「獅子山」做隊名，除咗覺得型，亦可以代表到香港一種精神。LION ROCK 獅子已經夠霸氣，岩石更加有一種堅定嘅氣概。
往後幾次行山都不其然會發現獅子山，就好似心裡面有個雷達一樣。但咩叫做獅子山精神？五十年前相信係「奮鬥」，但五十年後可以代表咩？
係對過去嘅懷緬？係對舊時代嘅認同？當年嘅香港人生活質素應該比宜家差好多，但我地已經返唔到轉頭，我地已經喺獅子頭，而當年梁錦松喺港大唱獅子山下已經不管用。
獅子山嘅精神喺現代嘅演繹，應該係將每個人喜愛同珍惜嘅事，一代一代咁傳承落去，咁先可以敵擋呢個禮義廉、無賴就無敵，永遠語言偽術就過骨嘅時代。你喜歡行香港嘅山，就要帶更多人去欣賞山上的風景，咁香港嘅郊野就有機會好好保留。因為愛係真實，能夠抵擋眼前嘅利益。好似香港發明嘅毅行者一樣都可以走出世界，到今年我地香港人都可以以五分一人數去參加韓國毅行者。35年毅行行到韓國，點止八千里路雲和月。
今次能夠同三個廿歲出頭嘅年輕人一齊行係非常幸福嘅事，當然當年何良同我行，佢49，我2X，我地跨年代去完成，無論行唔行得哂，你地三條茂李都應該嗌一聲：
師公OPPA，fighting
下星期四5月24日，我哋會搞分享會，介紹韓國毅行所見所聞。(按：請留意Fitz Facebook專頁) 同日亦係樂施會毅行者報名限期，你愛用毅行者方式，去體驗香港嘅美好就唔好猶豫，報名抽籤啦。
編按：韓國毅行者於5月20至21日舉行
「獅子山」小隊籌款網頁：https://oxfamtrailwalker.or.kr/en/node/5252
更多：
Fitz Facebook專頁
[有一班行山友叫獅子山] 韓國毅行第一戰「敢死隊」
[出戰韓國毅行] 有一班行山友叫「獅子山」
[韓國首屆樂施毅行者] 踏上全羅南道 進入仙境 文化遺產之旅
人稱Law少，前電台主持及監製，酷愛體育運動，多次參加馬拉松及毅行者活
動，近年更嘗試進軍三鐵及渡海泳。對於跑步、對於行山、對於比賽，均有深刻而令人動容的看法。著有《原來在沒有盼望 的地方才需要盼望》。
