Fitz > 運動 Sports > 行山 Hiking > [毅行備戰2016] 路線分析: 第五段 基維爾營至畢架山

 

各位毅行者去到呢一段,首先要喺基維爾營用十成嘅勇氣「再次站起來」,繼續前進。好彩迎接你哋嘅,只係一條緩緩落斜嘅沙田坳道。之後雖然要經兩座九龍嘅大山,獅子山同畢架山,但無論路況同難度,只普通級別。況且已經經過標誌性嘅M100標距柱,已經捱過一半路程!

第五段:基維爾營至畢架山001
飛鵝山道嘅日落靚景。不過絕大多數毅行者喺活動期間,都係無緣欣賞。

第五段:基維爾營至畢架山(CP4—CP5)

標距柱:M093-M109
距離:7.8 公里
途經:離開CP4基維爾營,進入飛鵝山道及沙田坳道,上獅子山,最後抵達畢架山頂CP5檢查站。

路況及地勢:

  1. 初段飛鵝山道及沙田坳道,俱為柏油馬路,緩緩向下而走。
  2. 過了獅子亭,進入獅子山郊野公園,為一般行山徑的石級與泥路。雖要上山落山,但坡幅不大。且因這段路為極之熱門之行山晨運徑,路況極佳。
咪以為封咗條馬路畀你行好過癮。腳痛行石屎路,真係要痛到叫救命。

注意事項:

  1. 參加者行完最困難的第三四段,即已完成一半程。所以第五、第六段可以抱著輕鬆的心情,迎接在城門水塘等待多時的支援隊。
  2. 毅行之神陳國強KK,當年畀我哋其中一個嘅毅行錦囊,就係「未過M100標距柱就唔好跑」。而呢支M100就喺呢一段,獅子亭前面幾十米。即係話你進入沙田坳道,如果狀態容許,可以試下跑幾步,鬆一鬆步頭。若發覺肌肉或關節有痛楚,就忍多陣先啦。
  3. 事實上,行咗四大段泥路山徑,一下子要行咁大段柏油馬路,真係唔易適應。我嘅慘痛經驗係,著咗對中價嘅行山鞋,腳板行到呢段當堂痛到飛起!所以,到之後幾次毅行者,去到呢度我情願快快腳,跑到去獅子山山腳,再慢慢行上山。
  4. 補給:獅子亭(沙田坳道路口)有士多,飯麵魚蛋燒賣都有。注意嘅係,目標時間30個鐘左右嘅參加者,去到獅子亭大概係深夜至清晨,士多老闆伙記應該去晒休息,士多雖然開門,但你隨時只可入去撳汽水機。
獅子亭士多
獅子亭士多
獅子山郊野公園嘅晨運徑
獅子山郊野公園嘅晨運徑

到達CP5的目標時間:
全程25小時:13小時45分(分段2小時30分)
全程30小時:16小時(分段2小時30分)
全程35小時:18小時(分段3小時)

註:有關「目標時間」

毅行者各站目標時間
(按圖放大)

參考自樂施會官網2012年參加者小冊子,千祈唔以為係行貨,根據本人經驗,佢列出嘅「目標時間」極有參考價值,計埋路況、山徑艱難程度,甚至休息時間。參加者依住佢個時間,可控制自己步速。

至於我只列舉25至35小時作參考,是基於對新手來說,這個時間概不用捱兩晚眼訓,而又不太難去衝破。當然,提多一次,呢個毅行備戰系列主要為新手而設,各位老手有咩心得,記得留言同我多多交流呀。

更多資料:樂施毅行者官方網頁

更多:
Fitz.hk Facebook專頁
[毅行備戰2016] 路線分析: 第四段 水浪窩至基維爾營
[毅行備戰2016] 路線分析: 第三段 北潭凹至水浪窩
[毅行備戰2016] 路線分析: 第二段 大浪西灣至北潭凹
[毅行備戰2016] 路線分析: 第一段 北潭涌至大浪西灣
[毅行備戰2016] 7至10月的訓練計劃
[毅行備戰2016] 11件必須測試的裝備
[毅行備戰2016] 如何挑選你的隊友?
Fitz Hiking 行山


文章為作者意見,不代表Fitz立場。