上個月，海洋公園推出「森度遊」活動，當中有一項叫做「秘行南朗山」，有導遊帶參加者行走南朗山「秘道」。點知，10月8日《蘋果日報》揭發呢條所謂「秘道」，其實係公家山徑，叫做「海洋公園登山纜車救援徑」，全長約700米。事件曝光後，海洋公園隨即將山徑入口嘅「不准進入」路牌拆除。
即係話，市民大眾都可以行呢條「公眾秘道」，喺纜車底下欣賞香港南區景色，仲係一毫子都唔使畀。
港鐵站6分鐘可達
好多人都對呢條山徑躍躍欲試，問點樣去。筆者充當鍵盤戰士，整理呢條路線嘅資料。不過聲明在先，現實情況變幻莫測，出發前留意下新聞，萬一又封路，咁就要摸門釘。
- 起點: 海洋公園港鐵站
- 路線詳情: 海洋公園港鐵站A出口，沿海洋公園道，經警察訓練學校，步行500米左右，會到達救援徑入口。
注意
- 救援徑入口無指示無路牌，係一條窄窄嘅樓梯
- 據聞救援徑中途裝有鐵閘
- 就算鐵閘開放，行到尾都係公園範圍，必須掉頭先可以離開
- 事情充滿變數，今日可以行，唔代表聽日行得，大家要留意新聞發展
Google Map 無標示路徑
全香港地點，講得出嘅基本上用 Google Map 都可以搵到路線。不過，呢條「海洋公園登山纜車救援徑」，雖然可以從衛星地圖睇到路徑情況，但 Google Map 就無標示。
此外，明明海洋公園道係一條公眾可使用嘅道路，不過 Google Map 嘅街景就無拍攝到警察學校之後嘅相片。
其實海洋公園呢個「收費行山團」概念，從各方面反應嚟睇，未推出已經注定會失敗，而家仲被揭發所謂「秘道」竟然係霸佔公眾山徑。不過經此一役，至少好多人都多咗個打卡目標。
去去，武器走！
