Fitz > 運動 Sports > 行山 Hiking > [獅子山精神隊] 致隊員Raymond: 你流鼻血,我流馬尿
獅子山精神隊 (左至右): Raymond、黃宗顯醫生Willy、Jacky、Law少。最右是好友潘潘

毅行踏入一個月倒數階段,可以做嘅事唔多 — 我地選擇咗通宵練山,畢竟體能再好唔代表唔使瞓覺,而對康復者嚟講,食藥嘅話一夠鐘就想瞓係我哋要面對嘅問題。

停一日藥再通宵行山會點? 今次預習一下,俾大家感受吓嗰種辛苦。(呢個有隊友醫生Willy指示,放心)

出發前,問 Raymond 最近點,鬱燥症大影響嗎? 佢話其實心情真係好差,行山真係好辛苦,但完成到個成功感又真係好滿足。

我亦都相信出完一身汗會更加好,我們要一齊向高山舉目。

夜晚10點出發行三、四段,天氣相當好,去到許生士多前的燒烤爐位,潘潘話可能休息嗰陣就睇到流星呢。大家抬頭即時見到同一粒,好興奮,仲要食 PIZZA 薯片慶祝。今年睇到兩次啦,35年嚟無試過,真係一日唔死一日有驚喜,人生有希望。

好一陣間已經行完雞公山 (四個鐘),相信係 Raymond 最佳時間。我以前唔明,見 Raymond 吊住兩隻手去揸行山杖,即係平路的話對杖完全無落地,然後我講咗一百次,放低枝杖,又發現佢都係吊住。

我明白,呢個係身體協調問題,反而我用好多唔同方法,例如數左右左右,我要聽到佢撻撻聲 (每次落杖都有聲),佢又有跟,節奏有變好。我忽然明白,除咗高,RAYMOND 要克服嘅難關仲有好多……(按:Raymond身高六呎二。) 另外一個就係腳腕唔靈活,唔可以打圈去轉,所以會好緊,成個人嘅重量有時就喺嗰點,證明佢嘅意志真係好勁好勁。

佢比我更有鬥志,唔食藥、捱眼瞓、唔協調、忍肚餓,每一件事都唔容易,但從來都無聽過 Raymond 話要早走要放棄。佢對不利嘅情況唔敏感,唔會驚無水又話痛唔夠力之類,反而有一種令其他人心痛嘅執著。正如,康復路上,需要鐵一般的意志,

說不出的苦變成不用說的強

如果大家有印象,未到基維爾營地前有個小草地,我同 Raymond 當時墮後,一天光哂之際,Raymond 把把聲流鼻血! 感恩成段路唯一嘅一張櫈就喺附近出現,可以好好地坐喺度休息,真係好安慰,因為要有個位耷低少少個頭都唔容易,而且個量都好多,成包紙巾用哂。

但 Raymond 一粒聲都無出過。我問佢係咪成日流,佢話唔係。一路擔心佢流唔停,一路扮冷靜叫佢深呼吸,再簡單做一個祈禱。

經此一役,最後行完大老山,11個小時,佢地初嘗毅行通宵行最難行段數嘅滋味,但基本上完成了唔停慢慢行直到終點嘅目標。

每次諗起 Raymond 頂硬上就馬尿在心裡流,太熱血。第二個睇唔到你有幾難,我知。

你會成為真正的毅行者。

如果你想支持我哋,歡迎到 獅子山精神隊籌款專頁 捐款,多多益善,少少無拘。

設計鳴謝: 築字室主理人Vicky IG: 築字室

Fitz 樂施毅行者

每年樂毅施行者,Fitz 都會組織一支隊伍,目的不是要挑戰時間,而是希望承傳毅行精神。今年我們以 Law少 許耀斌 帶領一支由精神康復者及精神科醫生組成的隊伍,期望可令市民對精神病有更正確的認識。

鳴謝行山鞋贊助:Merrell Hong Kong

有一班行山友叫「獅子山」

獅子山精神隊樂施毅行者籌款網頁

更多:
Fitz Facebook專頁
[毅行隊衣義賣贊助] 向高山舉目 與「獅子山精神」同行
[獅子山精神隊] 挑戰黑暗恐懼
[獅子山精神隊] 對不起,隊友們,我要變魔鬼了
[獅子山精神隊] 行毅行,起步之初
[獅子山精神隊] 37度下 新丁打大佬
[獅子山精神隊] 毅行開操 在西貢37度的一天出發之十八死士
[樂施毅行者2017] Fitz x 獅子山精神隊
Fitz Hiking 行山


文章為作者意見,不代表Fitz立場。