[登ABC後記] 十個重返尼泊爾高山的理由 (上)

1. 食行瞓的生活

如果你喜歡行山，目標 ABC ANNAPURNA BASE CAMP 你大約有七日六夜 (或者少一點的時間，視乎經唔經Poon hill)，你可以享受一個日出早餐而行，每天三點前下榻 mount hut 嘅生活，好好讓身體適應，避免高山反應。行程上大概係三節兩小時的登山，早餐 》行兩小時〉morning tea 》行 〉lunch 》行 〉rest，每天如是，一直累積K數。不仔細列出路線地圖，因為快慢按各人能力，總括一句: 放下你操練或比賽的心態，好好感受生活方式的轉變。平常的壓力、催迫、善後、綢繆都一步一步放下，好好享受這一種前進中的「慢」。如果一年只有一個星期假而你未嚟過，我有信心你行完會覺得值得。

2. 彩虹與雹交織的天氣

個個都話行山睇景，但其實天氣先係關鍵，而最神奇嘅地方係，所謂壞天氣都係充滿驚喜，頭一天登山，就到 mount hut 時，竟然開始落嘢……落雹。第二日又係咁，一日內經歷烈日、密雲、大霧、落雨、落雹、停哂、太陽出返嚟，咁都未夠神奇，當隊友 KERRY 喺 dining room 避完雨一刻問:「呢度有無彩虹?」喺窗邊就見到山谷中嘅彩虹，我癲到大叫咗出嚟。五月初行程中，我只係未見到落雪，唔係就集齊一套，咁都仲未夠，第六日下山的日子，早餐時呆望一舊舊雲，幻想緊好似一艘大船使出嘅時候，原來係雙峰呀……魚尾峰嘅倒影正正打在幾公里外的白雲上面，精彩到記得影相嗰陣，已經散咗喇。

3. 變幻的景致

我都估唔到第三點先寫景，我一向唔執著完成時間、風景唔執著、甚至乎 ABC 係咪去到都唔執著，或者因為試過喺 TASMANIA 上到 Cradle Mountain 臨時想攻頂，「揦手唔成勢」，最後過咗個 summit 指示牌就回程，無謂勉強，登唔登都係睇對自己有咩意思。其他山景唔多講，有吊橋、有流水、有冰川、有發銀光的石級，仲有到達 base camp 前的星光、當 ANNAPURNA 日光反照在雪山上的金光，與露天在4130m海拔的床，雪中的頹垣，令人聯想到「你那太空艙，能夠發出金色的光」，因為一個月前 ANNAPURNA 雪崩而令 BASE CAMP 淪為敗瓦，只有一間 tea house 有瓦遮頭，能夠食個溫暖 boiled egg 早餐已經值得感恩。當然可以外賣登 camp 滿足感。

4. 令人謙卑的體能

理得你喺香港識飛，當你見到 porter 挑夫，用頭搭條布連拉帶扯咁背兩個人嘅行李，包括喺山上用嘅大褸、睡袋、日用品，你先知咩叫負重，仲要著對懶佬鞋、仲有牛仔褲、唔使杖，同埋仲要行得快過你。一處地方一種人，人地 BB 就開始爬樓梯，無謂比較，更加明白香港山界命脈麥理浩徑點解係尼泊爾人 Gurkha 設計。當你越 feel 到見到體能咁大對比，就越應該珍惜香港可以輕裝玩山練山嘅機會。一句講哂，同馬拉松一樣，人地搵食架，live or dead。衷心欣賞。就如成個 Samuel Jackson 咁眼神嘅導遊 Dumber 話:「TAKE CARE YOUR LIFE!」

5. 無網絡甚至無電的生活 (短暫)

喺尼泊爾，除咗樽裝水你未必敢飲，係沖涼都唔會擘大口嗰種。有時會短暫跳掣停電、網絡係有電都未必有 WiFi，又收唔到電訊網絡，你終於可以完全放低手上嘅公務，好好投入當下。無電無 WiFi 其實都一樣生存到。

6. 動物正: 唔多講睇片

7. 碳水化合物大餐

2000m海拔以上因爲宗教原因就開始無肉範圍，每餐都開始變得簡單、薯仔、MOMO (餃子)、沙律，隊友 Victor 都問過一句，其實係咪所有餡都係同一種:「雪菜」。但你唔好話，配合當地人信奉抗高反嘅蒜頭湯，black tea mint tea hot lemon 日日咁食，真係日日有力。

8. 負重訓練最佳

負重訓練得嚟唔受傷，唯一方法就係唔好急，一步一步將重量放喺大大塊嘅大腿肌肉，連我呢啲平時揹兩 Litre 水都嫌多嘅人，都揹足 10 kilo day day 行，真係自己都覺得自己有力咗。平時喺香港揹一陣袋都會放落地，我覺得真係同空氣清新有關，用尼泊爾價錢換個瑞士山區肺。

9. 一個字: 平

乾淨、企理衛生。快到識飛嘅 Porter 都唔使$100一日，充電、WiFi、熱水全部$1X蚊。其他自己了解。

10. 一世人一次嘅組合

今次得幸福傳聲基金會朋友邀請一齊行 ABC，三個代表阿海、Kerry、Kayan 都無行開山，今次確實好大挑戰，Kerry 以前經歷過大病，都有少少高山反應，最後都喺3000零米應到。Kayan 頭幾日已經要紮住腫哂嘅膝頭，都捱到上 MBC，而阿海就沿途 FB update 資料，仲有另一位弟兄 Victor 托部相機影足七日 (我真係等緊睇片)，仲有 fit 到漏嘅 Debbie，一句:「唔可以唔試，最多唔得返轉頭」，就係咁，我地兩個加當地領隊 Kunjan 同副導遊兵分兩路先殺得上 base camp，之後仲追返大隊。最後不得不提前英軍體能教官 Panda sir 瞻前顧後，唔單止教我地上落雪地 (大佬無雪抓，著住對「所記」，跣到呢)，仲有好多人生經歷同屬靈智慧同我地分享，直頭過咗個 O CAMP 咁，當然想大家感受到山上嘅矚目之餘，同時亦要喺呢一篇清新下留意沙塵滾滾的尼泊爾人生活，應該講係尼泊爾人嘅生存，今次為一班從人口販賣、家暴、性侵、喪親等等救贖回來嘅年輕女仔開設類似 IVE 形式嘅就業培訓中心，就希望為遠方無助的一群感受到一點希望和愛心。

11. 請繼續捐款支持幸福傳聲基金

請按 link

如果想了解更多 ABC 行程，甚至下年有興趣同我地一齊行尼泊爾嘅山都可以聯絡我，自由行亦可以介紹同我上高山落社區，打點週到嘅領隊導遊你認識。

上山小貼士

• 衣著上，內膽衫褲要多，面褲一件，最好可以拆對腳管。預第二日重著少少濕衫曬乾，另外加一套瞓覺衫，最 minimal 兩套衫。可重用雨具同 rain cover 係必需
• 一般只行日山，頭燈係預登頂 (base camp) 天未光上山用，或者停電用
• 唔怕凍人士，睡袋可以用薄，用被好似春卷咁圈自己應該夠暖，唔係就著襪著褸瞓
• 行山小食不需要太多，水亦唔需要太多，兩三小時有 break 有餅乾有茶
• 上 base camp 當日怕冰地跣或者要買雪爪 (2-300港幣)，要雪褸加羽絨
• 藥物除咗過2500m前一日開始食 diamox，gingko (銀杏素) 可以前四日開始食

幸福傳聲基金籌款網頁
LAW少 許耀斌 Facebook 專頁

>> [尼泊爾ABC慈善健行] 主讓我認識的一個陌生名字

Fitz連結: https://fitz.hk/?p=119192