Fitz > 運動 Sports > 行山 Hiking > 點解要挑戰高峰? 令人思考人生的 Netflix 動畫《神之山嶺》The Summit of the Gods
香港首對珠峰登頂父子兵,曾志成與囝囝曾朗傑

時值尼泊爾登山旺季,差唔多每日都有人打破登山紀錄。成功登頂固然令人讚賞,而有勇氣去嘗試挑戰的人,亦令人相當敬佩。不過,總有人會問:「咁辛苦 / 咁危險 / 咁貴 (下刪一百項),點解仲要去爬個咁高嘅山,行咁遠嘅路?」係呢,點解咁多人要犯賤?

台灣曾格爾的千字文

呢位被喻為台灣美女登山家曾格爾,絕對唔係「郊遊遊」。佢三年間完成地球上14座最高峰其中10座,仲係台灣第一人完成8座尼泊爾境內8,000+高峰。而最難得就係,佢喺 Facebook 好詳盡記錄佢登山嘅經過同感想。想了解登山家要面對嘅困難,要經歷嘅磨難,可閱讀第一身文字。你會發現,曾格爾嘅千字文,唔會有個「苦」字,隨之而來,係佢甜美嘅笑容。

聽人講經不如睇電影

講登山講遠足講攀爬,串流平台嘅選擇多到數唔晒。Hardcore 可以揀《Free Solo》(赤手登峰)、《14 Peaks: Nothing Is Impossible》(勇闖世界14 高峰: 挑戰不可能)。兩套電影都係由頂級攀石登山高手,以第一身角度拍成嘅紀錄片,由佢哋親自解釋「挑戰」嘅意義,相當有說服力。

唔想睇紀錄片,都有劇情片。《Wild》(狂野行),主角由心理問題走入山野而達至心靈上治療,佢越行越長越行越遠,令人生有所成長。

電影《狂野行》劇照

睇動漫學做人

Netflix 有得睇嘅動漫電影《The Summit of the Gods》(神之山嶺),相當深入討論「點解人類要越爬越高」。故事講述一名喺登山意外失去好友嘅日本記者,進行採訪期間認識一名日本登山家,最後同佢一齊挑戰高峰,從而思考點解有人「搵命搏都要爬上高山」嘅問題。

《神之山嶺》係一套日本漫畫,原作漫畫故事作者夢枕獏,為咗寫呢個故事用咗十五年搜集資料,期間經常到訪尼泊爾,長時間同登山家及雪巴人相處,學習登山技術、裝備使用,以至了解登山文化,及登山者對山嘅信仰。夢枕獏有無登峰就不得而知,不過佢筆下嘅漫畫透過呢名日本記者嘅經歷,令讀者體會到登山者喺高山之下,要面對嘅生理及心理嘅難關。

Netflix 播映嘅《神之山嶺》,係由法國人改篇嘅同名漫畫。電影改篇嘅故事,以至畫面同配樂,比起日本製作嘅電視動畫劇集,有過之而無不及。.

《神之山嶺》結局留待大家慢慢品嚐,對於人類點解要挑戰高峰呢個問題,電影裏面並無問「點解」,主角反而提出更發人深省嘅問題:

「點解要爬山? 點解唔爬呢?」(Why climb? Why not?)

人生在世,總會遇到障礙,遇到困難,不過大家咪又係一步一步行落去? 人生如是,登山也如是。


文章為作者意見,不代表Fitz立場。