中秋同10.1四日長假期,撞正官方營地因疫情封閉,營友要親親大自然,都不得其門而入。所以唔少人都湧去啲「鬼鼠位」,令呢啲地方變成真真正正「集中營」。

網上露營行山群組,呢兩日就流傳一張疑似西貢赤徑圖片 (上圖),相中幾十個營幕排排露,相當壯觀,而亮點係呢一排營幕,全部都係紥喺海邊 (按: 赤徑並非正式營地,並且屬郊野公園範圍。任何人於郊野公園的非指正地點露營,均屬違法)。

有心水清網民,上天文台網站睇下呢兩日嘅潮汐漲退,發覺正值大潮,水漲時水高2.5米。換句話講,呢啲喺海邊露營嘅營友,夜晚潮漲時隨時要摸黑搬營,肯定十分狼狽。

去年越野賽「香港黃金百里」,赤徑CP亦曾出現漲潮「水浸」情況

其實露營百科101,露營搵營地海邊河邊都係下下之選,河水會暴漲,海浪會拍上岸,想清清靜靜瞓個靚覺,搵位絕對要諗過度過。

大家要留意,呢個假期公眾燒烤場同營地都未開放。   圖: 郊野公園教育活動計劃 Country Parks Education Programmes
更多露營搵位攻略,可參考另文


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。