中國五一長假期遊客湧到香港，由天星小輪售票機、油麻地警署，以至西環茶餐廳都排滿人龍，亦有大陸旅客去到大嶼山露營。
《Now新聞》報道，有由杭州來港嘅旅客丁先生，一家五口入住大嶼山貝澳營地，計劃住足五日四夜。丁先生話，營地環境好好，風景亦好靚。雖然唔會好似酒店住得咁舒服，但可以用慳咗嘅錢用嚟買多個手袋及購物。丁先生亦表示，呢五日會去香港其他地方旅遊，或者去東涌嘅outlet買嘢。
現時貝澳營地進行改善工程，原本54個營位只開放約30個，所以假期時有大批市民等待後補營位，而家多咗一班大陸旅客，營位更加緊張。
容許「非香港巿民」使用營地
貝澳營地由康文署管理，營地接受年滿18歲香港市民及持有效旅遊證件嘅「非香港巿民」，以先到先得的方式預訂。每日早上，亦接受申請人即場後補營位。每宗申請最多可入住營地五日四夜。
另一個接受預訂嘅營地「荃錦營地」，由漁護署管理。同康文署所定規距不同，荃錦營地雖然容許「非香港巿民」，不過署方訂明「非本港居民預訂上限為30%，即最多預訂11個營位」。貝澳營地咁受遊客歡迎，康文署係咪應該檢討申請營地嘅規則，以保障香港市民嘅利益?
事實上，遊客湧到政府營地同本地市民爭位，並唔係貝澳獨有，一到大陸長假期，唔少官方營地以至非露營地點，都會見到一班又一班遊客，政府營地原意係畀市民接觸大自然，而家變咗旅客嘅住宿地點，唔知政府會唔會撥亂反正?
去去，武器走！
