----- 廣告 Ad -----
![[HK100] 參加者專登上山畀人救_03](https://i0.wp.com/fitz.hk/wp-content/uploads/2016/01/HK100-參加者專登上山畀人救_03.jpg?resize=720%2C450&ssl=1)
(圖片來源:HK100 Facebook專頁 https://www.facebook.com/HongKong100/)
Hallelujah,希望大家都無事。
噚日一整日,大多數熱愛山野,熱愛跑步嘅朋友,都關注大帽山嘅情況。大家並唔係食花生,睇嗰位鬧警察唔畀佢上山嘅小婦人。而係希望了解參加咗HK100比賽嘅朋友嘅情況,希望可以人人安全落山。特別係,當我向HK100義工了解星期六日嘅情況之後,心情更加沉重,因為山上環境真係極為惡劣(見《[HK100] 義工面對生死的12小時》)。喺呢個心情之下,竟然睇到網上有人批評呢啲參加賽「自作自受」,話佢哋喺咁嘅天氣上山,又著咁少衫,根本喺度製造危機!
----- 廣告 Ad -----
![網上瘋傳嘅相片,小婦人鬧警察,唔畀佢上山睇雪。(蘋果日報相片)](https://i0.wp.com/fitz.hk/wp-content/uploads/2016/01/參加者專登上山畀人救-2.jpg?resize=640%2C360&ssl=1)
網上瘋傳嘅相片,小婦人鬧警察,話唔畀佢上山睇雪。(蘋果日報相片)
或者喺呢度,要解釋畀大家知,HK100呢項越野賽係咩一回事:
- HK100係世界級嘅越野跑比賽,更係國際越野比賽嘅其中一站。比賽選手嚟自世界各地(大會鼓勵不同國家嘅人參加),而報名雖然無確實門檻,但已要求參加者必需要具有一定經驗。
- HK100選手,要喺30小時內跑畢100公里。呢個時間,未經過嚴格訓練絕對完成唔到。
- 主辦大會對參加者嘅裝備有嚴格限制。上星期知道有寒流之後,大會已即時要求參加者在比賽中帶備風褸及電話。而大會會喺檢查站檢查選手嘅裝備,若有違反會取消資格。
![滑住落山](https://i0.wp.com/fitz.hk/wp-content/uploads/2016/01/參加者專登上山畀人救-1.jpg?resize=600%2C358&ssl=1)
滑住落山
好嘞,咁嗰啲話選手「自作自受」嘅市民,其實誤會咗啲乜呢?
1. 「點解唔一早取消比賽?」
上星期較早時份,天文台係話周末氣溫有6至7度,咁呢項國際級嘅比賽無理由取消啩。而且參加者係久經訓練嘅跑山選手,應該足夠應付有餘。
----- 廣告 Ad -----
2. 「咁天氣突然間咁凍,又點解唔快啲腰斬呢?」
比賽全長100公里,要橫越咁多坐山,可以話「發出嘅子彈無得返轉頭」。主辦大會要考慮選手可唔可以收到訊息(香港仲有好多郊野地區係無手機訊號)、點樣撤離,以及了解各位地區嘅情況,先可以作出合適決定。當星期六下晝已有選返到大帽山荃錦坳終點,大會要掌握馬鞍山嘅情況,其實談何容易呀。
3. 「啲選手係咪傻傻地?著咁少衫上山!」
佢哋係參加跑山比賽,著得太多衫係會影響跑步動作,其實更加危險。而大會其實亦有即時應變,喺每一個檢查站提供熱食熱飲,畀參加者保暖。
4. 「佢哋準備得好啲咪唔會有咁多人被困喺山囉。」
據新聞了解,呢次消防員救援其中一個最大問題,係大帽山賞雪嘅人潮,影響救援人員出入。事實上,喺星期日嘅朝早,已有唔少朋友指由荃灣坐車去大帽山,平時只係半小時嘅車程,因為荃錦公路太多車,結果塞咗3個鐘!而民間喺星期日朝早,已經由網上平台呼籲市民唔好上山睇雪。可惜仍然有市民去嗰度趁熱鬧。咁責任究竟係因為天氣突變而濟留山上面嘅參賽者,定係話極唔聽,死都去趁熱鬧嘅花生友?
唉,有人話,香港落雪其實係一場悲劇,因為反映了地球真係病入膏肓,天氣已經反常。其實落雪,又有咩值得開心呢?
![參加者已經添加仲保暖衣物。 圖片來源: HK100 Facebook 專頁 https://www.facebook.com/HongKong100/](https://i0.wp.com/fitz.hk/wp-content/uploads/2016/01/參加者專登上山畀人救-3.jpg?resize=720%2C960&ssl=1)
參加者已經添加仲保暖衣物。 圖片來源: HK100 Facebook 專頁 https://www.facebook.com/HongKong100/
咁如果以後再有呢一類惡劣天氣,要參加越野比賽又點準備呢?我哋訪問左HK 168冠軍黃浩輝,佢喺世界唔少地方都參加過呢一類越野跑。
輝SIR話:「喺準備方面,要留意天氣狀況,永遠將安全排喺第一位。始終呢啲都係興趣,無理由搵命搏,要屋企人擔心。」又話:「試過喺一啲多日嘅越野賽,划完艇濕晒身,然後入夜轉冷,身體凍到不能正常運作。」佢提醒,參加者有3點要注意:
- 減少體溫流失
- 增加飲食嘅能量吸收
- 減少被風吹到嘅機會。因為風會將體溫帶走,令人更感寒冷,所以最好進入室內地方。
希望呢次之後,每一位市民都可吸取經驗,唔好再有呢一類意外出現。
![(前)黃浩輝輝SIR: 參加比賽都要做足準備。](https://i0.wp.com/fitz.hk/wp-content/uploads/2016/01/參加者專登上山畀人救-5.jpg?resize=720%2C540&ssl=1)
(前)輝SIR剛喺夏威夷比賽返嚟,星期六都有去水浪窩撐場
----- 廣告 Ad -----
更多:
Fitz.hk Facebook專頁
發生在 HK100 的幾件小事
[HK100] 義工面對生死的12小時
Fitz Hiking 行山