[HK100] 參加者專登上山畀人救?

星期一早上新聞：消防員已將最後濟留喺大帽山嘅9位市民救出，其中有4位係越野賽嘅選手。(中午消息：HK100大會報告，所有參加者已聯絡上。) 

Hallelujah，希望大家都無事。

噚日一整日，大多數熱愛山野，熱愛跑步嘅朋友，都關注大帽山嘅情況。大家並唔係食花生，睇嗰位鬧警察唔畀佢上山嘅小婦人。而係希望了解參加咗HK100比賽嘅朋友嘅情況，希望可以人人安全落山。特別係，當我向HK100義工了解星期六日嘅情況之後，心情更加沉重，因為山上環境真係極為惡劣（見《[HK100] 義工面對生死的12小時》）。喺呢個心情之下，竟然睇到網上有人批評呢啲參加賽「自作自受」，話佢哋喺咁嘅天氣上山，又著咁少衫，根本喺度製造危機！

或者喺呢度，要解釋畀大家知，HK100呢項越野賽係咩一回事：

1. HK100係世界級嘅越野跑比賽，更係國際越野比賽嘅其中一站。比賽選手嚟自世界各地（大會鼓勵不同國家嘅人參加），而報名雖然無確實門檻，但已要求參加者必需要具有一定經驗。
2.  HK100選手，要喺30小時內跑畢100公里。呢個時間，未經過嚴格訓練絕對完成唔到。
3. 主辦大會對參加者嘅裝備有嚴格限制。上星期知道有寒流之後，大會已即時要求參加者在比賽中帶備風褸及電話。而大會會喺檢查站檢查選手嘅裝備，若有違反會取消資格。

好嘞，咁嗰啲話選手「自作自受」嘅市民，其實誤會咗啲乜呢？

1. 「點解唔一早取消比賽？」
上星期較早時份，天文台係話周末氣溫有6至7度，咁呢項國際級嘅比賽無理由取消啩。而且參加者係久經訓練嘅跑山選手，應該足夠應付有餘。

2. 「咁天氣突然間咁凍，又點解唔快啲腰斬呢？」
比賽全長100公里，要橫越咁多坐山，可以話「發出嘅子彈無得返轉頭」。主辦大會要考慮選手可唔可以收到訊息（香港仲有好多郊野地區係無手機訊號）、點樣撤離，以及了解各位地區嘅情況，先可以作出合適決定。當星期六下晝已有選返到大帽山荃錦坳終點，大會要掌握馬鞍山嘅情況，其實談何容易呀。

3. 「啲選手係咪傻傻地？著咁少衫上山！」
佢哋係參加跑山比賽，著得太多衫係會影響跑步動作，其實更加危險。而大會其實亦有即時應變，喺每一個檢查站提供熱食熱飲，畀參加者保暖。

4. 「佢哋準備得好啲咪唔會有咁多人被困喺山囉。」
據新聞了解，呢次消防員救援其中一個最大問題，係大帽山賞雪嘅人潮，影響救援人員出入。事實上，喺星期日嘅朝早，已有唔少朋友指由荃灣坐車去大帽山，平時只係半小時嘅車程，因為荃錦公路太多車，結果塞咗3個鐘！而民間喺星期日朝早，已經由網上平台呼籲市民唔好上山睇雪。可惜仍然有市民去嗰度趁熱鬧。咁責任究竟係因為天氣突變而濟留山上面嘅參賽者，定係話極唔聽，死都去趁熱鬧嘅花生友？

唉，有人話，香港落雪其實係一場悲劇，因為反映了地球真係病入膏肓，天氣已經反常。其實落雪，又有咩值得開心呢？

咁如果以後再有呢一類惡劣天氣，要參加越野比賽又點準備呢？我哋訪問左HK 168冠軍黃浩輝，佢喺世界唔少地方都參加過呢一類越野跑。

輝SIR話：「喺準備方面，要留意天氣狀況，永遠將安全排喺第一位。始終呢啲都係興趣，無理由搵命搏，要屋企人擔心。」又話：「試過喺一啲多日嘅越野賽，划完艇濕晒身，然後入夜轉冷，身體凍到不能正常運作。」佢提醒，參加者有3點要注意：

1. 減少體溫流失
2. 增加飲食嘅能量吸收
3. 減少被風吹到嘅機會。因為風會將體溫帶走，令人更感寒冷，所以最好進入室內地方。

希望呢次之後，每一位市民都可吸取經驗，唔好再有呢一類意外出現。

更多：
Fitz.hk Facebook專頁
發生在 HK100 的幾件小事
[HK100] 義工面對生死的12小時
Fitz Hiking 行山