Fitz > 運動 Sports > 行山 Hiking > KOL行山隨手丟果皮惹網民抨擊,大自然咩都可以分解?

山界熱話,呢幾日唔係討論瑜伽褲、唔係討論黑絲,而係果皮。早幾日有人將自己山上食柑嘅過程影相放上IG,不過就畀細心網民留意到喺佢身後,隱約見到一堆柑皮,似乎係有人摵完柑皮隨手亂丟。呢名女子人稱為美容界KOL,IG有14萬 followers,略有名氣,事件即刻被網民放大。而佢回覆媒體嘅解釋話:「老人家話果皮可以被大自然分解,丟嗰少少果皮應該唔係問題。」佢補充話多得網民嘅指正,下次會做得更加好。

咩係「垃圾」真係咁難明?

呢位 KOL 都算認咗低威,亦唔需要繼續針對佢。反而可以諗下,漁護署宣傳「自己垃圾自己帶走」咁多年,但仲有人唔係太知咩「垃圾」,某個程度都算失敗。

照常理講,「垃圾」就係大家唔要嘅物品。飲完水嘅水樽,抺完鼻涕嘅紙巾,食完餅乾嘅包裝紙,通通都係垃圾。咁點解有人會覺得唔食得嘅生果皮會唔係垃圾?

點解果皮係垃圾?

山藝教練何偉明,對於生果一類廢物棄置郊外環境,有一番見解:

  1. 分解需時: 有機廢物需要特定溫度及濕度先有利分解,就算有適當環境 (KOL將果皮丟在石面唔算良好環境),都要一兩個月時間分解。呢段期間會發出臭味,仍然會影響環境。
  2. 果皮、果芯係外來物種,有機會於野外繁殖,影響原生環境。
  3. 有機垃圾會引來昆蟲、動物,影響生態食物鏈。
  4. 人人都將果皮胡亂丟棄嘅話,大自然都分解唔切,最後郊野會變成垃圾堆。

最徹底嘅保護郊野做法,就係「山野無痕」。理想嘅目標一切帶去郊外嘅嘢都一定要帶番返走,乜都唔好留低,只留低你嘅足跡。

資料: Yahoo! 香港NM


文章為作者意見,不代表Fitz立場。
歡迎投稿: http://fitz.hk/contribute/