[回憶總是……] 那些年前的毅行者

最近行山Group出現呢條17年前嘅紀錄片（其實係1999年嘅《鏗鏘集》），我相信，每一位參加過毅行者嘅朋友，必定會一口氣睇晒佢。至於未行過嘅朋友，呢條片亦好寫實咁講到毅行活動嘅精要。

鏗鏘集 – 段段程長 – 毅行者(1999)

片段講述1998年三支毅行隊伍，12個成隊點樣完成呢100公里。喺唔少人眼中，佢哋絕對係新手中嘅新手，只求48小時完成。但佢哋顯示出來嘅毅行精神，比起15小時嘅快腳，肯定不遑多讓。

短片亦好握要介紹毅行者活動，令門外漢都有用。

唔再十八廿二嘅筆者，睇到呢啲歷史片段總有好多回憶：

----- 廣告 Ad -----

1. 那些年，我接觸毅行者，係著住瞓覺嘅運動褲、綿質Tee行100公里、背囊就係返學用嗰個，腳上就著住去街嘅休閒運動鞋。咩Compession、跑步背包乜乜乜，咩嚟架？
2. 那些年，有勇氣參加毅行者已經係一項成就，大家只係睇住時限48小時做人。
3. 那些年，資訊無咁發達，唔少人對於麥理浩徑都不甚了了。大把人都係喺毅行活動，第一次上雞公山，第一次行夜山。
4. 那些年，毅行參加者不太計較時間，只要完成100公里，40個鐘頭衝線絕不會羞恥。
5. 那些年，針山飽受山火破壞，山頭黑炆炆。
6. 那些年，安排補給會係大挑戰。因為Nokia 6150喺山上面根本係無用武之地。
7. 那些年，我都同佢哋一樣，喺基維爾被人捽腳捽到喊，亦試過捽人哋隻腳捽到喊。
8. 那些年，可以喺麥徑十段引水道衝線，腳底起泡而逼住喺石屎路跑步嘅痛苦，一生難忘。
9. 那些年，終點喺屯門軍營，地方開揚，出入方便，門口有的士有小巴有巴士。而家嘅大棠渡假營，簡直係叫天不應。

仲有那些年，《壹周刊》如日中天，當時裏面嘅中流砥柱，係被行家稱為「神筆」嘅許金峰，就係呢條短片嘅旁述。

更多：
Fitz.hk Facebook 專頁
[去吧! 毅行夢] 香港毅行者路線
[毅行者] 10句毅行者最常說的話
Fitz Hiking 行山