台灣一名7歲柔道新手於練習時，受教練、師兄輪流重摔27次，昏迷送院。男童住院70日未有蘇醒，日前親人同意拔喉，宣告不治。
事件發生於今年4月，台灣台中一間私人柔道館內，黃姓男童學咗柔道僅兩星期，疑因男童父與教練有磨擦，遭教練及師兄針對，練習時輪流重摔達27次之多。
情況被在場人士拍低，顯示男童一直有叫「唔好」，跪地求饒，但相關人士不為所動，認為男童只係怕受苦，甚至男童嘔吐後，舅父上前關心時，教練只係話男童「晚餐食得太飽」，因此事件引發台灣社會群情洶湧。
按: 截自自由時報電子報，片段或會令人不安。
男童昏迷送院後，院方證實顱內出血，瀕臨腦死狀態。住院70日未有蘇醒跡象，且血壓、心跳持續下降，延至6月29日，經父母同意拔喉，宣告男童死亡。
檢察署兩次傳召何姓教練，控以觸犯兒童及少年福利與權益保障法、以新台幣10萬元保釋。現因應男童不治，會要求法院以傷害致死罪審理案件。
任何武術應先學基本功
柔道男童昏迷及死亡事件，震撼台灣武術界。熟悉多種中外武術嘅台灣健身教練「館長」陳之漢，指無論係柔道、摔交定係巴西柔術，初學者都會要求先學習「護身」。即係話點樣利用背部、手臂肌肉，以至翻滾等方式，以減輕被摔時所受衝擊，令脆弱嘅頸椎及後腦杓不致受傷。館長話，佢當年至少用咗3個月練習翻滾後，先至有資格學被人摔。而呢名男童只有7歲，學得2個星期，根本唔應該要當生魚咁撻。
「館長」更加指出，呢次事件嘅教練係黑帶6段，咁高段數嘅教練根本唔會落手調教新手，所以佢覺得事件非常令人費解。
中華民國柔道總會已於4月事件發生後將教練除名。
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
