中國湖南武漢於12月18日舉行一場叫「漢武傅奇次翔武爭鋒 世界搏擊爭霸賽 (武漢站)」嘅拳擊比賽，當中最受注目係前 WBO 蠅量級拳王木村翔對陣中國拳手玄武。
玄武於大陸頗具名氣，佢係散打出身，其後轉玩自由搏擊，曾以「單腿單拳」KO 詠春師傅李楓，更KO了韓國跆拳高手。不過呢兩年少打拳賽，多以炒作新聞造人氣。
日本選手木村翔，可說係傳奇人物。佢原本係送啤酒工人，憑業餘訓練喺拳壇打響名堂。2017年擊敗中國奧運冠軍鄒市明，晉身 WBO 蠅量級世界拳王，於大陸廣為人知。後來佢輸咗幾場比賽無以為繼，近年以打表演賽為生。
用「倒頭樁」打拳擊
講返場比賽。第一回台，玄武多次伸腳絆低木村，拳證並無阻止，木村助手於繩角抗議。後來，木村助手索性走入擂台同拳證爭議，但賽事仍然繼續。
第二回台，玄武打法無變，都係以腳為主。後來更以施展一招「倒頭樁」，將木村抱起「頭下腳上」重摔 (見下面 Twitter 片段)。木村雖然未受重傷，但助手立刻宣佈棄權，與木村憤然離場。
かわいい後輩で元WBO世界王者の木村翔。 中国の有名YouTuberとのエキシビジョン。
ボクシングルールなのに最初から足掛けたり。最後の頭から落とすスパイキング行為はmmaでは反則。
ありえない。怪我じゃすまないぞ。https://t.co/kqSy97cMg1#拡散希望 #木村翔 #危険行為 pic.twitter.com/Y41EZT1luL— 真 人生迷子 (@3d337hTlUSeq5mG) December 18, 2021
呢個時候，現場旁述仲搧風點火，大叫:「玄武用中國功夫的一記暴摔，直接把木村翔先生給打倒了!」比賽拳證判決玄武以「摔法TKO」取勝。台下觀眾情緒高漲，向日本拳手嘅噓聲不絕。
賽後玄武公開短片，留言話:「中國打日本還需要規則嗎? 他不死我睡不著覺啊！」，仲話批評佢嘅網民係漢奸。
「你打咩例?」
賽後無論媒體以至網民，都聲討玄武嘅打法。業界怒斥賽事係「中國搏擊的恥辱!」當中最富爭議，就係拳賽採用咩邊一種規例。
木村翔本身係拳擊選手，按常理同佢比賽唔會打MMA，賽前玄武亦宣稱:「這次我要用你的拳擊規則打敗你」。而根據網絡流傳嘅對話，合約亦表示拳擊採用拳擊規例。此外，雙方出賽都係戴拳擊手套，著住拳擊服上陣。
拳擊規例下，拳手係唔可以用腳攻擊，亦唔可以有摔撻呢啲招數。
所以，一開賽時玄武用腳絆低木村，木村同佢嘅助手先咁大反應，要向拳證投訴。
拳證被擺上台?
大陸《新浪網》發表一篇文章，作者聲稱係裁判張旭朋友，佢爆出主辦大會有心設局誤導木村同拳證:
- 賽前裁判張旭多次問大會比賽用咩規例，大會都係答「到現場先講」
- 到比賽前半個鐘，主辦大會先通知裁判，比賽容許有摔撻。至於尺度係點，無再解釋，亦無任何白紙黑字寫低
文章作者覺得主辦大會有意隱瞞賽事可摔撻嘅規例。
中日拳壇表不滿
喺海報印上嘅多間主辦機構: WBU 世界拳擊聯盟、WKF 世界自由搏擊聯合會，以及中國國際綜合格鬥聯合會，都同時否認同賽事有關，話要保留法律追究權利。日本三大拳王發表聲明，指玄武蓄意傷人。至於中國搏擊界，就對呢種以「愛國包裝去提升人氣」嘅手法甚為不滿。
一場正當嘅運動比賽都要用愛國做包裝，喺國際上確實貽笑大方。
資料: 搜狐
