東京奧運雖然延期一年，但距離開幕仲有幾日，仍然傳出場地未準備好嘅新聞。《彭博》報道，三項鐵人游泳項目嘅東京灣海面，呢幾日仲有臭味傳出，有街坊覺得臭味似足廁所。
東京灣呢一帶海面，原本喺2019年8月舉辦三項鐵人嘅殘奧測試賽，不過當時發現海水細菌含量，比三鐵聯盟定下安全標準高出2倍，賽事因而取消。當局有見及此，喺呢兩年花費1.2億日圓 (約8,45萬港幣) 改善海面水質，包括於東京灣傾倒海沙、興建防污膠膜，以及喺東京市內興建雨水收集池，不過多年來情況仍未見大改善。
事實上，東京都市化有接近200年歷史，因此地下水道規劃未符合現代需求，例如雨水同污水並無分開處理，全部流向東京灣。一項2017年嘅研究指，東京灣嘅大腸桿菌超出世衛標準21倍。而專家更表示，就算花100年亦未必可徹底改善東京灣水質，所以2019年殘奧測試賽至今仍無大改善。
臨近奧運開幕前一周，東京地區天氣酷熱，雨量增加，都令東京灣水質變得更差。現任東京都議員，有30年三鐵經驗嘅白戶太朗 Taro Shiraro 表示，東京灣水質令運動員卻步，唔少三鐵運動員都好怕喺呢度比賽或訓練。
不過佢補充，世界各地好多三鐵賽都選擇於大都會舉行，唔少城市水質比東京灣更差。所以東京灣水質雖然難以改善，不過專業運動員應該頂得住。
資料: 彭博
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
