Fitz > 運動 Sports > 跑步 Running > [京都馬拉松] 拾下拾下去拾科!

2012 年 日本大阪市,本人第一次一個不小心參加咗 馬拉松賽事,第一次嘅意思係在完全無跑過 10 公里, 半馬及任何香港本地長跑賽事之下就膽粗粗憨 XX烏垂垂 之下報名參加咗千里之外嘅 42.195公里全馬賽事。事前足足花咗十個月時間從只能跑兩公里都跑得死去活來氣來氣喘倦得七個一皮,到賽前最長亦只是係大拿拿練習過一課 20 公里卻痛苦得好像徘徊地獄又再折返人間一樣,結果我用咗 5小時43分鐘勉強完成賽事,完事後我需要用柺仗走了兩天路!但同時間,我與跑步結下了不解之緣!

又其後我又不小心因爲誤交益友,邂逅並愛上了鐵人三項運動,亦參加過好多次十公里,半馬,街馬全馬乜馬物馬比賽,成績又是一個不小心的慢慢進步中。以一個半百阿叔來說本人跑得一點兒也不標青出色中規中矩但亦起碼不算丟人現眼如邯鄲學步烏龜慢游,好很多人快過我但還好我亦快過少少人,Sub4 同拾科這幾個字在我報了京都馬拉松之後不斷在我腦海中出現縈繞不去!

” 一個丹麥學者搜集了 2009 年至 2014 年歐洲及美國七十二個馬拉松比賽的數據,一共二百萬名參賽者的完成時間,删去精英跑手,沒考慮性別年齡賽道困難度等因素,得出平均完成時間是四小時二十一分鐘!” [ 我跑 ] 蔡東豪

四小時二十一分的平均速度, 即是長跑者口中的 披醒 Pacing 是 6 : 11/K,而如果要拾科,披醒就要提升到 5 : 39/K, 我近半年來半馬 PB 是 1:40 ,披醒大約 4:44/K, 數字上好像胸有成竹拾科十拿九穩,但其實所有跑者都知道全馬並不等於兩個半馬,後半馬其實會感覺等如兩個半馬!所以如果要肯定能拾科, 必需要有系統的鍛練 Interval, 中距離及長課等, 但基於我又要飛又要上班又要練車又要練水又過年又乜又物之下,長課訓練明顯不足! BUT!正如廿幾三十年前劉華喺一套幾乎老笠全套 衝上雲霄 嘅港產片 傲氣雄鷹 裡面講 : 有信心未必會贏,但無信心一定會輸! 而有咁啱得咁蹺 飛機撞紙鳶,信心,我有少少!

比賽前兩星期,長跑好手 Kaming 哥哥面授機宜………噢,無面授,應該係 Whatsapp 授機宜 : 一字記之曰 披醒,由頭到尾要睇住披醒做人,披醒難掌握過女人,披醒係一塲生理同心理大搏鬥 ! 頭半馬保持喺 4:45/K 到 5:15/K,之後十公里亦要視乎體力調節 披醒,跑步係關於消耗能量,跑得太快太早消耗晒啲能量,後段能量乾塘。到過咗一半路程 拾科唔拾科,拾四四五定三三零還是收唔到科大概自己已經估計得到,到咗最後五公里就唔好理佢鹵味定燒味一路加速,直衝終點!如是者我左手攞住個 iPhone 開住 Pace calculator 個 App, 右手揸住支筆, 對住部 Laptop 上面京都馬拉松嘅官方路線圖記底每五公里十公里二十公里最後十公里最後五公里最後三公里我大約應該用乜披醒跑, 喺第幾公里應該開始食 Power Gel,每隔幾耐又幾多包,我甚至連幾時食橙味幾時食朱古力味幾時食 expresso 味都預計埋, 老土? Old School ? 妖, 我根本就係個阿叔,有幾 X 奇呢又?

比賽前十日, 我哋又喺個去京都嘅 Whatsapp 群組裡面討論幾時開始 Carb Loading, 好多人望文生義以偏概全以為 Carb Loading 即係比賽前狂食炭水化合物就得, 但其實邊有咁簡單吖,而呢個時候我哋 MidageOnG group 裡面一位對一切運動數據趨之若騖達至執迷程度嘅少爺級院友又私訊我,將佢從一位知名馬拉松教練處學番嚟嘅 Carb Loading 獨步單方傾囊相授!本人聽完佢個方法之後心諗 嘩!係唔 X 係㗎? 咁 ?但基於大少其人外表雖則撟口摻手但其實真性情對朋友推心置腹熱血沸騰, 加上佢近來跑步成績又的確突飛猛進,在幾大就幾大燒賣就燒賣嘅大原則之下, 本人決定相信及完全跟隨!

比賽前兩日,到達京都市。今次比賽我家主席同行政執行副主席 ……….. 即係內子同小女亦破天荒同行打氣,但基於我要儘量保留體力關係, 呢兩日當兩位老細行街濕坪嘅時候,本人就二話不說 ……… 揾地方坐底休息, 同埋食 !

比賽當日, 習慣早到嘅我同隊友喺開跑時間個多小時之前到達會場,好整以暇換好衫寄好背包後分別去不同出發地點等候起步 ! 當日清晨氣溫 2C , 怕冷嘅我慶幸選擇穿著咗件跑步用嘅簿羽絨背心,戴好晒手套保暖, 否則在原地呆等差不多 45 分鐘的話肯定受不了變雪條,睇到好很多日本跑手只穿著背心短褲在不斷做熱身保暖, 除咗佩服佢哋年青力壯之外唯有認, 我係老嘞, 您叻 !

終於, 隔好很遠咁聽到起步槍聲响起,大伙兒起哄但又其實未真正跑得郁,因為人太多只可以一路慢跑至起步點跨過地上嘅電子計時器,42.195 嘅征途 正式開始 !

2 公里, 好多人,很多人,好很多人! 根本跑唔快, 睇住隻 Garmin , 只可以保持住 5:30/K 左右 ! 但我左腦同我右腦講 冷靜 ! 小不忍則亂大謀 , 只係頭兩 K, 而且披醒仲係拾科之內, 要快 首先要慢 !

5 公里, 人群開始拉開但依然好多人 ! 我採取策略儘量靠近內圍路邊跑,方便過人 ………. 噢,sorry 呢句有少少寸 !

10 公里,人群梳落咗不少,睇下隻錶 50 幾分鐘,心跳 115 左右 都係預期之內,按原定計劃, 每經過水站有電解飲電解,無就飲水,兩三啖就夠 !

15 公里, 水站前開始食第一包 gel, 橙味 好難食 ! 披醒保持 4:45 至 5:20 ,沿途群眾夾道歡呼,氣氛好到不得之了,跑過寺廟時連和尚大師們都出嚟打氣, 真係無辦法唔佩服日本人 !

20 公里,我跑過咗 拾科 嘅 Pacer ,即係話除非我俾佢過番否則已經肯定可以四小時之內完成, 拾科應該胸有成竹十拿九穩手到擒來了, 嗰一刻的確好開心!水站前食第二包 Gel 朱古力味, 好食好多 !大少嘅獨步單方 Carb Loading 果然厲害有料到,我居然完全無倦意步步有力!呢個時候問題嚟嘞, 我應該 target Sub 3:45 跑好定 Sub 3:30 跑呢 ?3:45 我要保持平均 5:18 披醒,3:30 就要 4:58 ! 電光火石之間我決定,屌 ,就 中間 5:10 ,跑多五公里再決定 !

25 公里, 獨步單方真係好那勁, 我仲未覺倦, 水站前食第三包 Gel , expresso 味 居然幾好食, 天氣開始暖咗少少 好舒服,我決定前面五公里保持 5 :00 披醒,希望做 Sub 3:30 !!

30 公里, 我準備食第四包 Gel, 但不幸嘅事情發生, 我唔知幾時跌咗最後一包 Gel , 無得食 !唯有攞 食物站嘅麵包仔食咗兩件 ,披醒亦開始下跌至 5:20 至 5:30 !我知道應該無乜機會 3:30 但 3:45 依然好有機 !

38 公里, 我終於開始倦,雙腳開始比較難抬起,四頭 小腿開始無咁有力,但意志力話俾我聽 屌 , 你仲有啲力收埋嘅,攞出嚟啦仆街 !

40 公里,睇下隻錶, 3 小時 30 分左右 ! 即係話 剩低嗰 2.195 公里我如果可以 15 分鐘之內完成就可以 Sub 3:45 !於是我喺後腰個腰袋處攞出 大少教我嘅 秘密武器 啪咗半支,咬緊牙關抖擻精神用盡最後馬力向前一直衝佢鹵味 !

42.195 公里 終點,最後 2.195 公里我用 4:55 披醒衝過咗, 總成績 3:40:10 ! My New PB !我 拾科了! 超額完成 !

終點過後,掌聲雷動,接下一塊唔太起眼嘅獎牌,但我依然好興奮,望住隻錶覺得之前嘅辛苦練習,Carb Loading 全部翻晒嚟,同時又自責點解會跌咗一包 Gel ? 否則分分鐘可以三字頭 3:3X ! 始終 3 字頭好睇好多嘛 !



美國 Runner’s World 雜誌其中一篇文章講過,跑步者可以進步七年,換句話講,七年後跑步者會進入寸進甚至不進步階段, 又換句話說我仲有兩年幾可以進步!

我慶幸年過半百先愛上跑步同三鐵,因為呢兩個運需要嘅係耐性同毅力,而唔係單單年輕嘅衝動,幾十年嘅閱曆話俾我知困難同埋阻礙永遠存在,跑步三鐵製造出來嘅困難阻礙失望辛苦,係人生嘅一部份,我會克服佢,因為我經已習慣克服困難!50歲前我有啲害怕呢個數字,因為社會約定俗成半百跟住嘅一定係老翁,我認老但我唔怕老,我認為保持老而彌堅係對自己同人生最大嘅尊重!

下一個全馬目標, 3:20 !

更多:
Fitz.hk Facebook專頁
[IRONMAN Phuket 70.3] (1) IRONMAN 是一件很浪漫的事情!
巖巖巉巉蝦兵蟹將從忐忐忑忑到戰意高昂出戰 Ironman 70.3
[Road to Ironman – 番外篇] 鐵人 · 有愛!
雷彬冶文@Fitz.hk


文章為作者意見,不代表Fitz立場。