休息是為了跑更遠的路f

踏入猴年,首先在這裡祝大家新年快樂,身體健康;猴年事事順景,跑者越跑越有。

自HK100後,自己銳意地讓身體休息了整整三個星期。休息的意思,是暫時停止了為提升運動表現的操練,亦都沒有去參與任何比賽。在這三個星期裡我只是輕輕鬆鬆地做了些緩步跑以及其他簡單嘅帶氧運動,加插一些睇戲、行街,讓整個人心靈以及身體,可以完全地放鬆一下。

完成了北極馬拉松,操練及競賽步伐其實一直都無停止過 (因為已訂了下一個目標,容許日後再交代及分享);踏入賽季,自己就開始馬不停蹄地參加不同比賽、務求將自己保持在一個「隨時 ready」嘅狀態。而十二月及一月兩個月內,自己更連續參加了多個高強度及長距離嘅賽事,包括三個馬拉松 (澳門、台北以及香港渣馬) 以及三個100 公里或以上距離嘅山賽 (TNF、TTF以及 HK100);屈指一算,單是這兩個月所跑嘅比賽里數,已經有440公里;對一個業餘嘅跑者來說,其實真的是相當的多。

細想起來,如此密集及艱辛嘅比賽後都沒有受很嚴重嘅傷,真的十分幸運及感恩。參與運動的人都十分明白一件事,傷患,永遠係運動員最大嘅敵人。一旦受傷,你萬般不願意也好,你都必須停下來休養傷勢。一般嘅傷患,動輒都要休息兩三個月,嚴重的更是半年至一年不等。而在停止練習及養傷嘅時間,運動表現就一定有所影響,甚至會下滑,最後自己心情大受打擊之餘,還要等傷癒後重新起步及操練,受傷嘅陰影有時更影響日後嘅表現及發揮。那份熬煉,真的未必每個人都跨得過。眼見過不少運動員,無論是全職或是業餘也好,受傷後無法回復受傷前嘅水平,很多因而一蹶不振,甚至最後黯然退出運動行列,真的是十分可惜。

預防永遠勝於治療,防範於未然總是比起出問題後才找解決辦法的好。當然運動有一定程度風險,因意外而受傷確是無法完全避免。然而不少傷患卻是因為積勞而來,這個就絕對可以由自己管理。要減少這種傷患出現,除了運動前後要做伸展外,讓肌肉有充份時間休息是十分重要。就如參加有系統嘅跑步訓練班也好,課程亦不會要求你每天埋首地狂跑,也會安排有「放假」日子好讓你身體休息休息。至於參加比賽,更是可以由自己選擇及安排。其實賽事日子實在不應相距太近,又或比賽太過頻密,尤其比賽過程中不多不少會較為「搏命」,肌肉勞損會更為多。如無足夠時間復元,肌肉無法應付不停嘅耗虛,那就只會日漸積弱,更加容易因為負荷過重而受傷。

圖片:HK 100 Facebook
圖片:HK 100 Facebook

有兩個很實在嘅例子可以同大家分享: 最近身邊有兩位朋友, 分別都想參加1月17日的渣打及1月23日的HK100。由於兩個賽事均對參加者嘅體能有一定要求,兩賽嘅日子亦相距不足一個星期,其中一位朋友決定只報半馬減少耗虛以讓自己有更多能力應付 HK100。後來這位朋友在12月一個賽事受了輕傷,休息過後傷勢有好轉也好,佢還是決定放棄HK100不作賽,最後只跑了半馬便算。當時佢好清晰地說:「養好傷,第日還有大把機會玩比賽。」目前佢狀態十分良好,傷勢亦康復得七七八八,現在還可以恆常去練習。至於另一位朋友,佢就選擇了全力跑畢兩個賽事。只是渣馬前佢已經有著傷患,結果全馬跑左半程已經開始腳痛;縱然最後佢能跑畢全程甚至PB也好,同一時間亦加重了傷勢。到了 HK100 ,這位朋友更要在三分二嘅路程中咬緊牙筋忍痛去完成比賽。當然佢都是有份刻苦及堅毅嘅精神,然而從另一邊廂來看,比賽過後佢連走路都有份劇痛,目前亦不得不全線停下來養傷,佢所付出嘅代價,其實也很沉重;至於值不值得,也確是見仁見智。

有時運動員操練得太投入,又或是狀態起飛中不甘稍停下來,最後把自己迫得太緊而受傷,那就真的是得不償失。要記著的是,「休息,是為著走更遠的路。」要懂得參透、明白「休息」嘅重要性,讓身體有時間作息以及充電,那樣才能越跑越有,可以跑得更長,可以跑得更遠。

更多:
Fitz.hk Facebook專頁
HK100,有感而發
Fitz Hiking 行山


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 休息是為了跑更遠的路