五月攞咗幾日假去台北玩下休息下，原本只係報咗名參加5月5日舉行的「烏來峽谷馬拉松」。報咗名之後，有跑友報料話原來之前一日 (5月4日) 仲有個「台北101垂直馬拉松」。諗住一雞兩味，玩多一個比賽抵好多，咁就膽粗粗報埋名了。
這個比賽好受歡迎，屬於秒殺賽事，最多人報名嘅「自我挑戰組」有5000個名額，但係幾個鐘頭就爆滿了!
比賽在台北101大樓地下 (1樓) 起跑，跑上91樓戶外觀景台，共跑90層2046級樓梯。比香港 ICC 的2120級畧少。但是大會號稱這個賽事是全球最困難的跑樓梯比賽。
----- 廣告 Ad -----
早幾年玩過兩次跑 ICC，所以對跑樓梯都有少少經驗。今次為咗準備這個賽事，兩次喺屋企大廈跑2000幾級，另外平日返工放工上落地鐵站等都盡量行樓梯，而避開電梯。本來今次心態係諗住純粹去玩，所以未必要練，但由於第二日仲要跑隻全馬，如果跑完樓梯跑到成個人散晒，第二日真係唔知點去跑馬，所以點都要練一下。
香港 ICC 嘅比賽在取號碼布當日要進行體檢，而台北101的比賽則在比賽當日才進行。跑手要先填一份健康申報表，然後量度體溫，以及進行一個30秒的閉眼平衡測試。成功通過體檢者會獲發手環，必須穿上手環才可通過之後的檢查關口，完成所有程序後就可以按跑手編號的順序排隊進行比賽。
我記得ICC係每組八至十個跑手一起出發的，而台北101這個比賽大會每2秒放一個人起步，以避免發生碰撞。
賽道中途設11個水站，以及六個廁所，安排都算得上相當貼心。另外大會在每隔幾層嘅梯級都會貼上一些打氣標語，當你跑到死死下嘅時候，睇到呢啲標語都真係有一定鼓勵作用!
賽道和 ICC 的不同之處，是ICC的中途有幾個走火層，跑手中途可以跑幾十米平路當係回回氣。而台北101則是一口氣由地下跑上91樓，中間並沒有走火層回氣， 或者這就是它號稱全球最困難比賽的原因吧!
因為第二日仲要跑全馬，今次本來我都係諗住慢慢玩，志在儲完成牌及到觀景台慢慢欣賞下360度台北景色就賺返了! 但係一起步又覺得狀態唔錯，於是就再次進入比賽狀態，認真對待。
----- 廣告 Ad -----
跑樓梯除咗用腳之外，雙手用欄杆借力的動作也是很重要的，有跑手更會穿上手套防滑。我就兩級一步及一級一步交替，輔以雙手用欄杆借力，中途要注意呼吸，有需要則要調整速度，用慢行作休息。
有一位號碼細我幾個冧把的跑手（即早我幾秒出發）和我全程咬住上，更加激發起我的鬥志。他一直位置都大約在我半層樓之後。我立定決心不要被他爬頭，所以錯過了所有水站，亦完全沒有停下來休息。中途逢人個人的感覺頗過癮，一路行一路睇住樓層的數字越來越大… 85…86…87…88…89…90…..終點在望了!
終於我以18:40.96的時間衝過91樓的終點，再次呼吸新鮮清涼的空氣! 精神馬上為之一振。比賽前一晚瞓得唔係幾好，起床時頭重重，半夜仲痾咗四次 (懷疑係飲完啤酒吃西瓜之固)，比賽完成反而精神晒! 一定係安多芬的作用了!
賽後和剛才拍住上的那位跑手傾談了一會，原來今次是他的第一次跑樓梯比賽! 很利害!
講返大會嘅安排，今次最令人欣賞嘅係各項環保措施。大會估計五千人嘅活動要用超過60,000隻杯，於是大會安排了租用環保水杯，省下了幾萬隻紙杯! 好希望香港嘅賽事都可以參考。因為次次比賽都要浪費幾萬隻紙杯其實都幾折墮㗎。
另外，大會紀念賽衣是用回收咖啡渣製成的「咖啡紗」，以及五個膠樽的物料做成，質料具備吸異味、抗UV、快乾功能。我也穿著了它來出賽，感覺很通爽舒服。這項技術是由台灣研發，希望香港賽事嘅賽衣都可以考慮採用。
回顧以往三次跑樓梯比賽:
----- 廣告 Ad -----
2014 ICC – 18:48
2015 ICC – 18:17
2019 TP101 – 18:40
咁多年都冇乜進步，或者係時候要再加油練習，今年年尾再去挑戰 ICC 了!
Fitz連結: https://fitz.hk/?p=119042
更多:
Fitz Facebook專頁
[樂華半馬精英賽] 川內優輝的風采
[廣州馬拉松2018] 120元好超值 全方位完跑報告
Fitz 跑步 Running
