運動鞋洗唔洗？點樣洗？點保養？呢個問題就似跑步用腳踭定腳掌一樣，係跑步圈子經常講嘅問題。既然係咁，就上網爬一輪文，總結有以下幾個要點：
1.畀佢唞下
想運動鞋增加壽命，最簡單嘅方法就唔著佢囉。而日練夜練嘅運動愛好者，最好就有兩對或以上嘅運動替換，以免令加速鞋子嘅老化。 而平時行街拍拖，就唔好著對戰鞋去威咯。
2. 咪懶！除鞋要解鞋帶
現今跑鞋布料極具彈性，若果大家懶惰唔解鞋帶除鞋，久而久之，鞋會被拉鬆。
3. 收好對鞋
跑鞋最忌放喺太熱或太凍嘅地方，著完最好放喺陰涼地方。長期唔著，可以收入鞋盒，鞋籠放入報紙吸濕除臭。
----- 廣告 Ad -----
4. 揀啱鞋跑步去
唔同跑鞋有唔同功能。比賽鞋鞋底較薄，用嚟練長課就好快打柴。跑街嘅鞋用嚟跑山，就會令到鞋底坑紋好快磨損。總之，咪將對鞋嘅功能cossover，就會令跑鞋壽命更長。
5. 洗得？唔洗得？
網上有人話自己大汗到夏天跑10K對跑鞋可以有水滴出，對鞋可想而知有幾臭。呢啲case唔理佢真係唔掂。跑鞋品牌嘅官網堅決叫人唔好洗鞋，建議用專用清潔劑去噴。有網民亦怕會洗爛鞋，話話用吸濕劑吸走啲臭味就算。當對鞋臭過你對腳，係咪搵嘢噴下就可以除味？咁啲細菌又點？而且，跑完山，落完雨，對鞋想唔洗都唔得。
縱合全球網民經驗，跑鞋只要洗得其法係唔會爛（跑鞋紙紥嘅咩）。首先唔好用洗衣粉，只要用清水洗，如有污漬就用少少牙膏；用牙刷輕輕拭擦鞋嘅表面；唔好成隻鞋放落水浸，用水沖下就得；可放入洗衣機fing乾，但時間不可超過一兩分鐘；洗完放喺陰涼地方陰乾，記緊鞋內塞入報紙，以固定鞋嘅形狀及吸濕。
資料來源：Youbeauty、Mizuno Running Taiwan、Hood on Running
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。