Fitz > 運動 Sports > 跑步 Running > 孤而不毒 | 國際孤獨等級量表之跑界版
我的孤獨歲月。邊個影㗎? 咪扮晒獨啦,成班friend係正對面

社交紅利

據聞人類是社交/群體動物,社交有什麼紅利: 以下是重點:

  1. 幸福同綿被一樣,要晒才產生溫暖。想像下如果入左個赫密士包包 ,又或者去了一次肯雅睇動物大遷徙,如果冇人知冇人問冇人起哄,錢豈不是白花,此生豈不是白過?
  2. 交流最新資訊,大家都急著奔走相告有關何伯何太的最新動向,誰知道何太結婚的真實次數就有話語權,贏得眾人欣羨和榮耀。你未試過你唔會知果種滿足感到一點。
  3. 平分支出,一班friend去食火鍋唱K搭的士,除了可以品嚐更多類型美食,結帳總數除4的性價比一定高過除1。
  4. 分工合作,星期五晚去老尖網紅點讚的餐廳,一個人去排住隊,一個人去睇menu,派二人小隊去搵另外有位的餐廳。又或者上廁所,可以交低晒大包小包俾冇需要去的friend或兵。又有friend幫手打咭,拍那些扮晒一個人的背影相。
  5. 最後但同樣重要,一班人一起可以互吐心事,傾倒情緒泥頭: 鬧完老細唔係人,跟住埋怨老公/老婆當你隱形、最後投訴奶奶/外母睇你唔起……,然後,你會精神更健康,步履輕盈地在晴朗的一天再出發。

雖然社交有巨大紅利,但不少人覺得一人之境仍然可以盡興。有網友 (「網友」其實是費事查核來源,或根冇呢個人存在時用) 曾經製作了「孤獨等級量表」,用來量度孤獨精指數。

不知有多少人完封十級,其實不認識這位 Amoxil Wang,相信不是香港人,可以坦白一點說,其實一至四級真的十二萬分碎料。自從數年前大X樂推出一人火鍋套餐後,第五級一個人吃火鍋,已經不是一件傷感的事情。第九級有些奇怪,一個人住梗係一個人 (叫搬屋公司) 搬屋,大家都不是連姐有咁多朋友。第十級確實少有一個人做,需知這是最後改寫遺囑的關鍵時刻。

跑界孤獨等級量表

跑,本質是一個人的運動,但基於人性,跑已經肩負社交任務和派發上述的社交紅利。但在跑界仍有大量的獨跑者 maverick,觀察到有以下一人之境的行為,有做過的請✔,5分題代表自閉級,10分是變態級,15分是 non-human 級。

1) 一個人在運動場的400米跑道完成了42.195K的全馬,即105.49個圏 (10分)
2) 一個人loop大帽山連姐至波頂十次,或針山十登,或loop孖崗總攀升4424米 (15分)

跑班6位 non-human 同學,在百福道至天后廟道之間的樓梯,分別loop左8848米的珠峰高度出來 (Everesting Challenge: 態度決定高度),也有同學在孖崗山來回攀升了4424米,好毒 (情繫孖崗山 | 攀升4424米偽珠峰)

3) 買左對N記蒸氣飛3或S記 Ultra Pro/Advance/Plus, etc,冇話俾人知冇出post (10分)
4) 抽中東馬/UTMB/報到波馬,冇話俾人知冇出post (10分)
5) 一個人完走 Translantau 140,冇人support冇出post,只通知妻子/仔女 (如有) (10分)
6) 全馬sub 3/做到PB,冇話俾人知冇出post (10分)

成為萬金友,可以唔出post嗎?呢個挑戰可能大過sub3

7) 完賽即走,冇同任何人溝通 (5分)
8) 比賽跑入頭三名,但冇留低攞獎就離開 (後來知道有鞋送會後悔幾分鐘) (10分)
9) 一個人去三日兩夜露營,話傾左好多偈,同自己 (10分)
10) 一個人去爬珠峰/富士山/,但沒有生意失敗/失戀 (5分)
11) 跑左10個以上山賽,全都是solo,從未曾試過組隊玩team (5分)

加起✔的分數,總分100, 專家 (冇錯,係我) 分析如下:

0-5分

你的行為十分不跑友,但十二分香港人,合理推斷你跑齡短,注重跑衫多過跑姿。亦缺乏安全感,上CamX 買包 gel 都有4個 frd 一起,以防被騙,行家樂徑會擔心迷路或墮崖。

6-80分

你係一個正常跑友,完。

81-100分

你有以下一項或多項特徵:

A. 你實在太快,快係冇朋友
B. 你只懂講和寫南非語

Anyway 你好享受一人之境,不需要向人炫耀什麼 (咁你究竟為乜而生存?) 你只有兩位掛心的朋友,一個係自己,另一個係仲未俾番飯錢你的同事。生命寶貴,建議你安裝警方的 HKSOS app,每次去操練/比賽前,請向老婆說出「我愛你」,和網上理財密碼。

其實以上行為 (包括不出post) 不是有病,只不過不依世俗紅塵的期望,也無需渴求別人的認同。綿被,也可以由自己的身體產生溫暖,帶來幸福眠!

親,祝願大家孤而不毒!

一個人跑得快 (咁唔一定要咁大隻嘅)
一班人跑得溫馨

文章為作者意見,不代表Fitz立場。