經歷42公里的路程,終於望見家鄉,仲有幾百米距離就到終點,見到喺終點等梗我嘅係領域美人,我身邊係supporter,跑過42公里,明明終點只係得番幾百米,卻係這麼近,那麼遠,我跑緊同時終點都好似跑緊,點都唔肯俾我跨過個條終點線……

行山謊言落賽場

2017年夏天某日,悟空恩導我玩另一個山賽,路線會經過我地平時走過既東洋山,而佢同意志虎嘅經典隊會參加團體賽,我想挑戰下自己,所以就決定報名參加42公里個人賽,但報完名就開始淆底,因為自己連平路馬拉松都未玩過,就要挑戰個人越野馬拉松,真係勇氣可加,呢個比賽就係苗圃挑戰12小時越野馬拉松。

苗圃相比起揹水一戰會有更多山徑路段,當中有我最討厭既引水道,全程一路跑冇得休息,玩左山一段時間嘅人都可能有同感,又或者只係小弟太弱。為左預計時間,我搵埋意志虎一齊試路,我地將全程分左三次黎試走,感覺都唔錯,亦都預計咗比賽當日嘅衝線時間同大概名次。點知,呢個預計成為左我突破嘅契機。喺試路期間,意志虎竟然因爲報名費太貴,決定唔參賽,經典隊變成全力 support 我,嗰刻有種俾人賣豬仔既感覺……而為左有好狀態完賽,比賽個星期我只係跑左幾公里,以免身體太累。

右意志虎陪小弟試路

無限突破!

比賽當日,臨開賽前就腥個信息俾經典隊成員,而佢地就預番時間係不同位置準備 (真係萬分感激,因為佢地係請假義務幫手)。

開賽後,數咗自己大概排名就 keep 番自己速度,再慢慢追前面,但每當我行緊回氣既時候就有人過我,輸唔切既心態令我跟住距地跑,所以到達 support 位置嘅時間亦快左吾小,所謂跑得快跌得更快,到東洋山 M38 見到意志虎時,我已經感受到抽筋大師,嗰陣只係完成左十幾公里,當時只可以祈求天父做廿幾公里好人……


到左引水道,小腿已經間歇性抽筋,需要靠特警卓幫我捽藥膏,好不容易捱到去孖指徑,抽筋大師完全上身,見到四頭同小腿成個肌肉形狀,痛苦萬分,重要俾樹枝插穿左鞋面……但低處未算低,城門水塘打後,抽筋大師究極上身,要靠 support 無限推拉先到達草山頂,幸好中途有操山人士俾左粒鹽丸,叫做可以舒緩下。係雙腳酸到熔點既情況之下終於去到終點前既平路……

小弟到草山頂既痛苦拉筋
攝: [email protected]運動筆記

為左要型住咁跑過終點線,所以係終點前幾百米儲定氣拉筋,以防再抽,就喺再起跑個陣,見到係終點等緊我既係領域美人,而一臉輕鬆嘅 supporter 就係身邊跑緊,最終,幾經辛苦,歷盡艱辛,終於俾我捉到名為終點嘅尾巴,跨過終點……成績係第五,時間比預期慢二十分鐘。當刻我個身體想坐低但雙腳曲唔到,身上既汗乾左變成粗鹽,對住三位 supporter,我臉上痛苦不堪,但心裡感激萬分,而距地臉上露出從未有既輕鬆,代表著我一場敗仗……

終點前平路,3位 supporter 輕鬆陪跑 攝: Stanley Wong
感謝3位 supporter 全力支持先可以完成到比賽
重有幸得領域美人支持,褲上滿佈盬同藥膏
對鞋狀烈犧牲左……

後記

  • 其實突破即係指抽筋,代表抽左廿幾公里……
  • 事後諗番,賽前太注重休息,令里數不足,所以往後比賽週都照操爆。
  • 賽後開始記住往後比賽跑贏自己嘅人,希望往後有機會同場可以超越佢地。
  • 成績遠遠慢於預期,浪費左美人同 supporter 心機,但呢個成績提醒往後自己冇得懶。
  • 最終對腳酸左我兩星期……
  • 為日後另一復仇戰留下伏線

Fitz連結: https://fitz.hk/?p=117611

更多:
Fitz Facebook專頁
[巔峰山記] 一開波就玩毅行打大佬
[逆走100 Rebel Walker] 愛情 vs 100 km
[逆走100 Rebel Walker] 那些你追隨冒險的夢 我陪你去瘋
哭在逆走100km後
Fitz 行山 Hiking


文章為作者意見,不代表Fitz立場。

歡迎投稿: https://fitz.hk/contribute/

廣告
絕對領域
放工淨係識訓教同運動,終日無所事事既九十後,公司小職員,自2016年被上司推入越野界深坑後,閒時就上山親親大自然,再閒時就玩下比賽測試下自己。 可能未必有人想知,但都想同大家分享下我既山記,同時紀錄低話哂自己都叫年輕過。