從來無諗過,跑步勝地青山公路都可以咁多人。

3月14日星期六,下晝3點,我揸住部錢七諗住泊喺大欖轉車站然後跑下步。點知去到發現停車錶位full晒,然後向荃灣方向,一路搵位:

  • 青龍頭: 滿
  • 青龍頭碼頭避車處: 滿
  • 深井深慈街路邊: 無晒位,部份車泊上行人路
  • 機場核心計劃展覽中心停車場: 滿
  • 舊青山公路 (汀九村): 滿晒,學神都無位學車

結果,我要去到山邊別墅嘅小路邊,先搵到一個周圍都係垃圾嘅位。

大欖轉車站

嘉頓係重災區

搞咗一大輪,先可以開始跑步,但呢個周末青公人潮眾多,我遇過最多人一次,係某年渣馬前一個禮拜,由近水灣至麗都灣一段,粗略估計有成百幾二百人一齊跑,不過當日因為大家都係跑步,所以都叫秩序井然。

但係,而家青公嘅人潮以慢步人潮為主,有啲無良街坊更踩部單車上行人路。大家要明白,青山公路部份路段都幾窄,只有三至四呎寬,你一行兩三人打橫行,其他人真係唔夠位過。


我都好明白條路人人有份 (踩單車嘅朋友唔該唔好踩上行人路),你有你慢慢行,我有我哋鳩衝,不過唔該留番啲位畀其他人,唔好塞住條路。

重災區可以話係嘉頓 (向荃灣方向) 上斜一段路 ,唔少人就咁企喺路邊照相,又唔理附近有無人行過。

咁究竟嗰個下晝青公有幾多人? 我真係無數過,但我喺汀九跑咗兩圈,一共8公里,前前後後講咗十次八次「唔該借借」,呢個數字係我跑咁耐青公都未試過。

「跑步就戴番個口罩啦!」

大家為咗抗疫,肯到戶外絕對支持,所以跑步人士同行人只要互相禮讓,係完全無問題。不過,當我喺麗都灣,畀一家大細阻住行唔到,我講完「唔該借借」之後,有人竟然同我講咗句:「跑步就戴番個口罩啦!」

人多要防疫,戴口罩好應該,所以嗰一刻我真係駁佢唔到。

或者,我下次跑步要搵過條路線,或者搵過另一個時間。

有人教我下次跑步可以戴呢啲大媽至愛嘅太陽面罩

不過,仍然要提醒返大家:

  1. 疫症時間,遇到人多嘅時候,無論戶外定室內,最好戴返口罩
  2. 行人路未必好闊落,慢步走或跑步請唔好阻路
  3. 行人路不要踩單車
  4. 勿亂拋垃圾


文章為作者意見,不代表Fitz立場。

歡迎投稿: https://fitz.hk/contribute/

廣告