過了終點之後,我向三位綠BB頭頂白波身穿 04:00hours 號碼布的 pacers 作了近乎90度的鞠躬,不管你們明不明白,反正我都要感謝了,沒有你們,我就會輸給了酸的手、硬的腿、梗的腰、我就會向「應該還是那個做不到的我」屈服了,失敗又會再一次、然後無限次勝利了……

如常,賽前事總多,毅行支援兩晚無眠,星期一就因精神不振,落樓梯就一時踏空,腳小拗腰小搐,唉,已經忍住唔同佢地行到尾,只行4-8段慳返9-10段,都落得如此下場,信心真係有動搖。由東馬留下來的一條保安膠帶,承諾PB先剪,睇嚟都係帶到出年,點知急急去針灸又真係鬆得返,然後星期五晚坐一班深宵機就到了東京。

呢個序幕如往常一樣,患得患失中回顧2月到宜家做咗d咩夠膽死要 PB 同 sub-4。依然無操 interval,純跑多咗去大浪灣同淺水灣,每次練習15km以上,喺完全無 time 過速度嘅情況下,制定55/53/53分完成頭30km然後找數嘅計劃下出發。


講真,我最怕凍,幾度起步要熱身都好難搞,但係一個猛太陽加河口湖一轉彎就見到嘅無敵大富士山,我真係大叫一聲「傻哥兒呢」,然後又密密往上爬。可能係跑得石屎山路多,唔係好覺斜路斜,有一種點解回頭路都係落斜嘅感覺,但明明去已經係落,真心唔知係咪亢奮嘅幻覺,既然咁開心就唔理啦,一路衝。

如常地因爲可以喺山邊快速小解減磅而開心,如常地因爲只吃天然食物都夠飽而高興 (我袋咗隻蕉走咗30km最後大派用場,只遺憾由香港帶咗四包朱奶,結果因為臨時轉 and carry 而被迫掉哂。) 如常地因爲一手拿到朱古力豆同提子乾而興奮。到20零km,跑到件衫白白地出哂鹽嘅時候,有街坊係俾兜鹽你一手拿,wow…咸爆實在太 high,後段半隻蕉半隻蕉咁拎,令到成條供應鍊都好似有完美鋪排。

賽前打算如果做唔到55分10km就放棄SUB-4,開心睇吓黃葉,望吓山景,完走就算。但係睇住做到做到,咁就專心一致為最後跌 watt 嘅時間做儲備。另一邊箱,呢對我前一日同今日先著嘅4%事實上你剛剛好緊,俾多一分位都無。我都驚腳指襪係咪會迫到隻腳指尾衝哂血。

值得記錄係因為天氣凍又濕,起步濕度無聽錯係百分之一百,然後就不斷起痰塞氣管,如果要統計邊個係吐痰紀錄保持者,我估我應該可以被稱成「飛劍跑手」,但氣管塞嘢飲又凍嘅情況之下,都無其他辦法,最要小心係分清楚邊撻係公園枯葉,邊撻係私家庭園,相信應該無整污糟人地方。

飛劍跑手一直有個盼望就係會唔會有熱嘢飲呢,熱嘢飲又會唔會碌死人呢? 呢個時候就要上段無敵斜,我鴨仔步密密腳就解決咗佢,喺不斷過人之際,到接近30km嘅路段,對腳開始都有感覺唔妥,靠意志階段就開始。

然後一個急轉彎位,竟然係出一個會唔捨得走嘅補給點,供應麵豉場,情景就好似去咗掃街咁,人人都隊杯碗仔翅,就當我好爽肝飲完再上路之際。

從未留意到嘅4小時 pacer 就出現,對於我嚟講就好似死神來了一樣,之前辛苦儲埋嘅 quota 莫非就喺我最攰嘅時候先嚟用哂? 我心裡面不斷懷疑自己係咪可以死跟到尾。

第一次跟住 pacer 跑,原來真係好有士氣,每逢一到km數牌,帶頭三位就會嗌一炸日文,然後後面嘅人下意識就嗌一聲,我都「呀」順便為自己打氣。去到水站前佢又會提我地,之前我就開始玩追逐戰,因為 pacer 係幾乎無停低飲水,即係話我每次埋水站同食蕉之後,都會見到佢地頭頂個氣球慢慢飄遠,然後又要急追。

最攞命係鴨仔步上完條大上斜之後,當然就大落返一段,吓吓咁鋤都驚抽。一抽就想 keep pacing 都唔得,喺呢個時間我不斷祈禱,最後唔夠一小時幾km路,已經係無依無靠,只求神俾力量我雙腿同心臟可以堅持到捱到去尾。呢刻係我最感動,回想咁多次練習上落山,我覺得我對得起自己嘅承諾,唔係我最終做唔做到,而係我呢刻無放棄。然後喺我感覺到蕉食完燃燒之際,我同自己講,我要跑喺 pacer 前面咁我先至唔會氣餒,因為佢地係一個4小時就到嘅鐘,只要我唔再見到佢地,我就完成目標,仲可以安心補水。

最後3km,鐵腿加膝頭痛,同時見到兩個女高中生因爲其中一個抽筋,另一個喺度等佢,然後拉幾下,再跑返仲快過我,然後又抽,然後到另一個都抽,不斷抽但速度都無減低,一跑就超前,我好佩服,最後我都追唔到佢地,但同樣地我無再俾 pacer 見到,喺最後覺得超漫長嘅一公里,望住個鐘,3:59:2X開始,我一步一秒,喺四小時的煙花巨響前,終於到達。

我覺得富士山變成一個四小時路程嘅奇幻背景,成個景色壓縮喺腦海而列車呢刻終於到站。賽後遇上三位pacer,想起獅子山精神隊,甚至乎我跑步嘅態度,原來就係同佢地一樣,無可能當上冠軍,亦無可能每次PB,但有餘力地好好把握我個 pacing 讓更多可以更進一步嘅人跑在我前面才是最美麗嘅畫面。

而呢一刻條東馬膠帶已經唔需要剪,因為佢已經好好地完成任務,要多謝佢。

(後記: 女友 Cherry 喺名古屋六個半鐘跑全馬嘅紀錄下,突破六小時內去完成,亦都非常驚喜。尤其感動係十年前我地嘗試一齊挑戰全馬,結果因為太慢而雙雙上車,到今次齊齊在目標時間內完成,絕對超額感動)

Law少 許耀斌 Facebook 專頁

Fitz連結: https://fitz.hk/?p=108932


更多:
Fitz Facebook專頁
[東京馬拉松2018] 龍珠爆氣式完走東馬
[渣打馬拉松2018] 人生中最重的一場感冒

廣告