[挑戰南極100公里] 練習之日常

由

2016-10-17

繼續為南極 100 公里練習。

今次開始要枕住練習越來越長嘅距離，所以要用慢 d嘅 pacing。要 Gary忍腳跑慢 d真係辛苦左佢，我唯有好好發揮自己嘅作用，成日提佢要跑慢 d跑慢 d兼且自己真係跑慢 d 嚟牽制住佢 (其實係無力跑就真………)。今次係 Gary第一日著非跑路嘅鞋跑步，感激 Patagonia 嘅贊助，佢地嘅 product真係好好，好舒服，Gary亦好快適應倒兼一口氣著住嚟跑左 26km。原本今日嘅目標至少跑 42km, 頭 26km我都好好地，點知26km後又跌 watt了，頂多 7km後就已經跑唔郁兼想嘔想抽筋，最後 33km就要止步。嚟緊真係要好好地部署一下練習，爭取時間好好再操練及提昇自己，同 Gary攜手完成賽事。

唔，咁樣影應該睇唔出領跑員係咪被領跑中..... — 唔，咁樣影應該睇唔出領跑員係咪被領跑中…..

在此希望作個呼籲：我同Gary主要係響馬鞍山練習，因為較為合適練長課，沿途係有水機士多作補及。我地跑嘅範圍大概係由恆安地鐵站對出嘅海濱長廊跑到去大埔海濱公園。未來長課會加長，我地可能至少有 5、6 小時甚至更長嘅時間響呢個範圍出現。我地連埋領跑繩，其實會佔左兩個半人嘅身位，佔嘅空間比較多，響某d窄嘅路段有時會佔用左單車徑，希望大家能夠體諒及包容。然而我地練跑嘅時候亦經常遇到唔少困難，包括很多途人都打橫一排地在行人路行走動佔用了大部份路面，好多單車都踩上了行人路，又或是在行人路中心停下來休息；有時我會舉手示意希望迎面而來嘅途人可以讓一讓路，又或是向我地前面背住我地嘅人大叫 “唔好意思唔該借借”，只是好多時候途人都低著頭用手機，又或是帶住耳筒聽音樂，所以睇唔倒聽唔倒我地嘅訊息；試過睇倒聽倒也好，仍是沒有讓路。更甚的，試過有架單車迎面見到我地，還故意由單車徑高速踩入行人路，刻意在 Gary 身旁擦身踩過。

因為有好多路段路面很窄，我地亦很難做倒細微嘅閃避動作去避開途人，又或是需要較多嘅時間去作出反應，遇到頭先所講嘅情況，每每到最後我地都需要急停去避免發生碰撞。其實我地已盡量安排在非人多嘅時間練習，但畢竟練習時間會增長，總會避不了繁忙時段。因此希望大家能多一份為意我地會出沒嘅範圍，如果見到我地練習，希望能對我們作出遷就，讓路比我地跑過。也希望大家能幫忙，協助我地提示響我地附近嘅單車、途人去為意我地嘅存在。最後，希望大家能這個呼籲分享出去，讓更多人能夠知道及明白我地練習時嘅需要。