川內凱旋回歸日本

剛出爐嘅波士頓馬拉松冠軍川內優輝,由美國返日本凱旋回歸,一落機隨宣佈,出年4月放棄公務員嘅工作,加入職業跑團,投入專業訓練。

川內話,因為波馬贏到嘅15萬美金獎金,令佢喺經濟上少咗好多壓力,可以令佢作出對自己更有利選擇。

「我絕對唔介意做而家嘅工作,不過當全世界以及我自己,都希望我可以更進一步嘅時候,我只有改變而家生活啦。」言下之意,就係辭咗份工,全職投入長跑訓練。

工作情況

由埼玉縣教育局退下

川內住喺埼玉縣久喜市,係埼玉縣教育局嘅公務員,現職於埼玉県立久喜高等學校,擔任文職工作。雖然要輪班工作 (有時返上晝有時返下晝),但工作時間相對穩定,而且有關部門亦相當支持佢嘅跑步活動,例如今次波士頓馬拉松,佢差唔多一個月前已開始休假,去美國準備賽事。

短片: 擔任久喜市親善大使


不過,川內始終要返工,未能夠全身投入跑步訓練。據報道,川內每日只係喺返工放工時間,操練個半鐘左右 (佢屋企離工作嘅學校距離20公里,每日都係跑步返工),每星期只有兩次高強度訓練。

辭職後嘅川內,必定更多時間投入跑步訓練,劍指2020東京奧運。

而且,因為川內而家係公務員關係,謝絕一切商業贊助。辭去職務之後,相信係各大品牌爭相搶奪嘅代言人,到時竟然佢著一剔、三間,定係而家佢著緊嘅日本國產A牌呢?

有興趣了解川內優輝的日常生活,可看看TBS早年為他拍攝的特輯:

資料來源: Nikkan SportsDaily.co.jp自由時報久喜市官方網站

Fitz 文章連結: https://fitz.hk/?p=92397


更多:
Fitz Facebook專頁
[波士頓馬拉松2018] 川內優輝男子奪冠 美加選手女子揚威
[平壤馬拉松2018] 北韓官方短片 解構最神秘馬拉松
台灣長跑賽 補給食物多到要投訴
Fitz Running 跑步

廣告
Fitz
我哋坐唔定、無時停,唔做運動唔舒服! 只要係有用知識、重要資訊,以至好玩話題,Fitz都會全力搜羅,同時鼓勵「郁民」齊齊參與,打造一個開放嘅運動生活資訊平台。