[渣打香港馬拉松2019] 半馬挑戰組新增截跑點 2個鐘馬師道截人

由

2019-02-12

Fitz > 運動 Sports > 跑步 Running > [渣打香港馬拉松2019] 半馬挑戰組新增截跑點 2個鐘馬師道截人

渣馬未起步，連號碼布都未派，已經出現「關公災難」。上星期五 (大年初四) 渣馬主辦大會「香港業餘田徑總會」發佈電子版賽事手冊，被心水清嘅跑友發現重大問題: 半馬挑戰組新增了2個「截跑點」。

根據手冊資料，半馬挑戰組由原本限時3小時，變佢限時2小時25分，參賽者仲要於限時通過個截跑點: (注意: 半馬一組及半馬二組不受影響)

依照簡單計算，跑手要準時通過兩個截跑點，必須達到平均步速每公里6分鐘以內，比原本全程21.0975公里限時3個鐘，大概步速每公里8分半，相差甚遠。

田總解釋，呢個改動為咗符合國際田聯 (IAAF) 要求，要「清空」全馬賽道，避免全馬嘅前領跑手受到半馬嘅慢腳影響。本來以為將參賽人數，由3000人減至1500人，已可順利過骨，但最後IAAF還是say no。

有片有真相，有跑友就記得差不多每一年，都有呢位「半馬跑手」鄧簡文做「攝石人」:

而呢位鄧簡文，亦已經喺個人Facebook 上「公布」，今年因為田總改制而唔會再同非洲選手切磋:

其實呢位「跑手」，幾年前已經開始喺渣馬出位搶鏡，話田總因為佢而改變，未必完全講得通。雖然從上面片段所見，全馬精英跑手的確有被其他跑手影響，但令公眾最反感的，仍然是田總的處理方法:

容許轉組

事件發生之後第四日，星期一大年初七，田總終於積極回應有關事件，更在記者招待會透露會作相應安排，例如容許半馬挑戰組跑手更改出賽組別。(相關新聞短片: 香港電台網站)

可以報名參加半馬挑戰組，理論上應具備2小時 (男子)及2小時05分 (女子) 完賽能力。不過，不少跑手是經屬會報名，未必夠信心達標 (見上面有線新聞訪問片段)。如果係半馬挑戰組跑手，老老實實，點算好?

狀態夠，有信心: 仲使講，go ahead 啦。新增嘅「截跑點」反而成為你推動力，有利PB
信心唔夠，驚衝唔到閘，咁唯有等田總公佈轉組嘅安排。但係你要由天未光嘅5:45起步，轉到日上三桿嘅8:00起步，到時要應付較高溫度，亦會遇到三號幹線上嘅全馬跑手，比賽條件比挑戰組差好多，唯一可喜係有3個鐘嘅限時，畀你慢慢跑。

仲有一點要留意，容許轉組後嘅半馬一組，相信會有更多跑手同時落場，大家空間只會更少，更隨時會影響埋全馬跑手。所以呢次田總嘅安排，絕對影響深遠。