Fitz LogoFitz LogoFitz LogoFitz Logo
  • 運動
    • 跑步
    • 越野跑
    • 行山
      • 行山路線
        • 西貢
        • 新界中
        • 新界北
        • 新界東
        • 新界西
        • 離島
        • 九龍
        • 香港島
        • 海外
    • 健身
    • 單車
    • 游泳
    • 三項鐵人
  • 活動及比賽
    • 香港比賽時間表
    • 本地活動及比賽
      • 長跑及馬拉松
      • 越野跑
    • 海外馬拉松名額
  • 生活
    • 露營
    • 旅遊
    • 校園
    • 飲食
    • 保險
  • 裝備
    • 一般裝備
    • 跑步裝備
    • 行山裝備
    • 單車裝備
    • 能量補充品
    • 露營裝備
    • 拍攝裝備
    • 穿戴裝置
    • 手機App
  • 聯絡
    • 聯絡我們
    • 短片製作及商業攝影
    • 網站簡介
  • 聯絡我們
  • 短片攝影
  • 活動策劃
  • 商業合作
✕
            沒有結果 查看所有結果

            [渣打馬拉松2018] 神打上身之的初半馬後感

            • 主頁
            • 所有文章 Posts
            • 運動 Sports 跑步 Running
            • [渣打馬拉松2018] 神打上身之的初半馬後感
            青藍 2018-01-31

            字 Decrease font size. 字 Reset font size. 字 Increase font size.

             

            終於有時間執返我嘅初半馬後感。(以下係千字長文,真係慎入)

            有係谷到睇過我嘅 post 都知,我由星期五開始無啦啦發燒。就好似我小學時期一到大考就一定會發燒一樣,估唔到呢個問題到咗廿年後嘅今日都會發生。係谷入面好多師兄師姐叫我睇西醫快啲好,但我最怕食西藥驚手腳無力,加埋副作用最怕到星期日都落唔到場,最後我都係去返睇中醫。

            食咗3劑中藥其實都半退燒狀態,但每日都眼光光咁失眠,令到我更加驚同擔心。到咗星期日唯有4:00am 起身順便探熱,37.3度 (Google話正常體溫36.8-37.5度)。都算正常,於是決定咩都唔諗換衫提早出門,去7仔叮兩個三文治,係地鐵到食完就出發到尖沙咀,周圍行下坐下等開跑。

            ----- 廣告 Ad -----

            37.3度,上巴士就上巴士啦。

            其實話無燒,但我根本失晒聲,幾用力都發唔到聲。心諗算啦,跑步用隻腳又唔係用聲帶,盡跑啦,見唔妥就散步,最多未上巴士囉。練咗咁多個月,臨門一腳先唔畀我入閘﹖我點都要落去行架啦!

            排隊上場啦! (估唔到同隔離個師姐撞鞋)

            一開始,彌敦道全平路,一直唔敢叫自己跑咁快,驚住後面無力。但好多跑手係後面撞上黎左穿右插,但我選擇隨心跑。奧海城之後連翔道開始上斜,我開始要慢落黎。直到上到去7-8K 青葵公路到西隧之前,左右兩邊都係圍牆,基本上除咗望到個天空同前面堆跑手之外都無咩風景好睇,又無人打氣,仲開始見到大家企埋一邊拉筋,心情同個天一樣咁灰呀! (好彩去到11K 左右有位女工作人員同我地打氣,仲話﹕就到隧道啦加油呀~ 個一下真係由個心到笑咗出黎。)

            終於跑到見到圓方,西隧就係前面,真係連自己都估唔到,我終於可以黎到西隧! 當時我個心好激動,好想喊出黎,練咗咁多個月,終於可以用自己隻腳跑入去啦! 個滴眼淚仲係眼到未流出黎,見到前面好多人打氣,仲有好多槍手,呢一刻我知道,我唔可以喊,我更加要笑住跑入個窿到!

            係西隧門口之前,有塊廣告牌係咁寫:「練咗咁耐無理由退」。的確,我練咗咁多個月,由最驚要上巴士,努力減磅操機練青公,唔敢再整傷隻腳,都係為咗呢一次。你叫我退? 我 DNF 上巴士都唔會退。

            練咗咁耐無理由退

            ----- 廣告 Ad -----

            練咗咁耐都係為咗呢條路

            於是,我以8分披姿態跑出咗西隧去到上環。出咗西隧,隻左脾開始唔多聽話,本身8K 左右左腳內側條筋開始痛,明明開跑前拉足筋熱足身,不過已經無咁多時間諗點解。出咗隧道之後向著制服隊嘅姐姐拎d野搽,但一開始我已經講過我失聲,我唯有支住佢手上個支白色的東西,佢又呆咗望住我,我又望住佢。對望咗一陣佢先明我意思,示意我出去膠帶外,仲倒到我一手都係白色的液體,瀉到落地下。

            無咩經驗又唔知點搽,唯有是旦撻落隻腳到揉下算又繼續上斜路去上環。好多人話干諾道天橋條斜係挑戰,對我黎講信德中心先係挑戰﹕逆!風!跑!忽然間身邊無咩人,跑得好辛苦,諗起之前睇陸王,茂木會跑慢啲係對手後面擋風,我都決定用呢招,盡量跑快啲入返人群堆中,擺一副打拳格,手高頭低衝落中環。

            落到中環,好多打氣嘅朋友,好多野食! 真係好有氣氛,之前個十幾畸雖然令人灰心過,但見到咁多人打氣,又立即開心返晒! 之前成手松節油,加上喉嚨唔好,唔敢亂咁食野,又怕食埋松節油落肚,於是只係食咗粒提子同腸仔,再慢慢跑落灣仔。過埋會展,係附近返工嘅我知道好快就會到終點,諗住輕鬆跑埋去。點知,人生最不幸嘅事終於出現,一上到馬施道天橋,耳機無電。平時慣咗聽歌跑嘅我開始亂,唯有同自己講仲有1K頂硬上! 轉入駱克道,打氣聲連綿不絕,我靠住沿路無停過嘅打氣聲同每一支槍一直殺入銅鑼灣,過咗Sogo 之後我已經痴左線,一到跑一到同前面慢落黎嘅人大叫:加油呀終點啦! (明明已經失聲無咗把聲。)

            就係咁,係五味紛陳嘅感受下完成咗第一次半馬比賽。

            之後成個維園塞住咗,想搵個地方拉筋都無,落到地鐵站拉筋,我開始作嘔,我就知道,呢鋪我真係瀨咗嘢。返到屋企探熱,燒到38.6度。

            諗返係西隧個位師兄,睇住架急救車係我身邊行過,救護員一直幫佢急救。我諗頭先個2粒幾鐘,我咁都無事,除咗我鬼上身同神打之外,我解釋唔到點解我可以完賽。

            (第二日睇西醫,燒到39度。畀醫生知道我跑完半馬,剷到我上天花板。完。)

            其實無論如何,都要十萬個多謝周遊烈跑嘅師兄師姐一直為我打氣同關心,呢幾個月嘅準備,多謝A 神同陳伯,一直畀好多支持,鼓勵同信心,由本來11月12月練長課好驚上巴士到成功完成。仲有我朋友圈入面嘅師兄們,畀左好多意見,我就算跑唔跑到落唔落到場,無你地,我都未必咁有信心咁練習。

            ----- 廣告 Ad -----

            下年,我唔要再病,我要做時間,我要再跑好D!
            出年渣半馬再見!

            更多:
            Fitz Facebook專頁
            跑步,咩嘢係最緊要呀?
            學識尊重 才會學識跑步
            跑步啫,你估賽馬咩?
            青藍@Fitz
            Fitz Running 跑步

            分享
            青藍
            青藍
            青藍 -- 成日「也文也武」,也文方面喜歡寫網上小說與散文,也武方面鍾愛跑步與行山,相信每場比賽都有每種感受。

            請飲咖啡 支持我們

            © 2025 by Fitz Group Limited | All Rights Reserved
            • 聯絡我們
            • 關於我們
            • 私隱政策
            • Team HNR
            • 9 Event
            • LINE Today
                      沒有結果 查看所有結果