仲有幾日就係渣馬大考。呢幾日,有5件事記得去做,否則有可能會影響比賽表現:

1. 休腳

大致而言,比賽前七日要減少訓練量至正常日子嘅30%,亦要可取消所有負重訓練,避免令肌肉累積酸痛。亦有講法係賽前3日訓練量減至50%或以下,賽前兩天全唞。至於咩方法係最work,真係要靠經驗累積。

2. 剪腳甲

腳甲過長,跑動時有機會撞擊腳頭,引致腳指受傷 (最常見係黑甲)。在比賽前一星期記得剪好腳甲。切勿在比賽前一兩日先剪,如果剪得太貼肉就會影響比賽。

3. 注意飲食


呢個禮拜,盡量戒絕生冷嘢 (如壽司、魚生、雪糕等)、煎炸嘢、刺激性食物 (辣嘢),避免刺激腸胃。亦可多食纖維,令腸道暢通。總之盡量要食得清淡,麻辣火鍋呢啲,留番比賽完去慶功先食啦。

至於「醣原負荷法」呢類專業運動員級數嘅飲食方法,識跟就自己跟 (參考《[醣原負荷法] 運動科學策略 提升半馬/全馬表現》),唔識亦無謂而家先學。如果係跑半馬或全馬,就可以比賽前兩天食多啲碳水化合物 (如白飯、意粉)。

打邊爐就比賽完咗先啦

4. 生活作息

比賽起步時間係朝早,咁就要呢幾日開始適應呢個起床同作息時間。由今日開始,盡量早睡早起。而要爭取時間瞓覺。

記住,唔夠瞓絕對影響比賽當日表現。 (參考《想要跑得晒,跑得快,先要瞓好覺》)

5. 檢查裝備

反正呢個禮拜你都會心情緊張,咁不妨預早整理比賽當日嘅裝備。

裝備分為兩類,一類係比賽時跟身嘅裝備 (由跑衫跑鞋至power gel);另一類係比賽前後嘅物資 (如比賽前用嘅凡士林、比賽後飲嘅朱奶)。

今日可以整理呢兩袋物資,見到有咩需要購買及添置,都趕得切。

Fitz連結: https://fitz.hk/?p=113456


更多:
Fitz Facebook專頁
[渣馬備戰攻略] 寒冷天氣跑步大法 (日常練習與比賽須知)
[渣馬備戰攻略] 可以用跑步機練馬拉松嗎? (或其他長跑距離)
[渣馬備戰攻略] 科學支持 5種比賽前中後的飲食偏方
[渣馬備戰攻略] 4條經典長課路線
[渣馬備戰攻略] 如何進行長課練習?
Fitz Running 跑步

廣告