打波先嚟落雨,要怨個天; 臨起步甩碌,就只能怨自己。根據外國網站調查,下面6件事,當見於各大小長跑比賽:

1. 無帶號碼布或扣針

練得咁辛苦,點知去到現場先至唔記得帶布! 返屋企拎? 定係照去跑放棄個官方成績? (有啲比賽連起跑線都唔你入) 簡直係人生交叉點。仲有係,記得帶埋扣針呀。

2. 起跑先至嚟內急

一場比賽閒閒地都一千幾百人參加,臨起跑先發覺人有三急,即刻排隊去廁所都未必趕得切。年年渣馬,有唔少人未過西隧,就已經要排隊去廁所,有人仲要搞到就地解決添。

北京馬拉松最經典鏡頭

3. 裝備跌落廁所


有人因為太急於去廁所解決,結果太陽眼鏡、手機等隨身物品,一個唔留神就失落廁所。損失嘅並唔係財物,最大影響肯定係賽跑時嘅心情。聽過最大鑊,係臨起步將啲 power gel 跌晒落廁所……

跑緊時去廁所,跌嘢事少,影響心情事大

4. 手錶無電無訊號

比賽前記得試清楚,手錶嘅續航能力有幾強,更加記得前一晚要叉足電。起跑前,亦早啲連接好衛星訊號。藍牙 earphone 都記得叉好電。

5. 無帶短褲

有朋友去到現場換衫,先發現自己無帶跑褲,結果要將長褲剪短出賽。其實唔單止跑褲,跑衫、跑襪,甚至跑鞋都要早一晚準備好啦。嗱,跑步群組嘅朋友好鍾意早一日將全身裝備影低,係真係有實際用途嘅!

6. 扯斷earphone

一跑到廿幾三十公里,身上嘅裝備甩下甩絕不為奇。其中最常見係,跑手跑下跑下,會將有線耳機一嘢扯斷! 好彩而家有無線藍牙耳機,可以避免呢個問題。不過,隨身裝備就真係要諗辦法收好。有人試過跑跑下腰包啲 engery gel 爆開晒,要一路跑一路搵水沖身。

資料來源: competitor.com

Fitz連結: https://fitz.hk/?p=113743


更多:
Fitz Facebook專頁
[渣馬備戰攻略] 2019中途退賽程序及截跑時間
[渣馬備戰攻略] 起跑前 大家最驚乜?
[渣馬備戰攻略] 全馬 半馬 十公里 路線簡介
Fitz Running 跑步

廣告
Fitz
我哋坐唔定、無時停,唔做運動唔舒服! 只要係有用知識、重要資訊,以至好玩話題,Fitz都會全力搜羅,同時鼓勵「郁民」齊齊參與,打造一個開放嘅運動生活資訊平台。