馬師道「閘口」,離終點不足2公里。萬一被拉閘,絕對係人間慘劇。

對於「跑得慢,唔夠快,無速度」嘅跑友,與其要佢哋研究邊個位加速可以快幾分鐘,倒不如研究點樣唔會被DQ! 享受比賽都有時間限制,今次為大家列出各項目及組別嘅拉閘及DQ時間。

2019半馬限時及拉閘情況

半馬分3組,分別為挑戰組 (05:45)、一組 (08:00)及二組 (08:30)。

主辦大會「香港業餘田徑總會」在比賽前一星期公佈新安排,半馬挑戰組 (5:45起步) 新增兩個截跑點: (注意: 半馬一組及半馬二組不受影響)

  • 截跑點1: 西隧收費廣場 (約13公里),限時1小時15分
  • 截跑點2: 鴻興道馬師道交界 (約20公里),限時2小時
  • 馬師道至維園終點 (不足1公里),有25分鐘限時

按圖放大

半馬挑戰組新安排

  • 挑戰組過咗截跑點嘅限時,就會被截停。至於有無「回收車」接載佢哋返終點,暫時未有公佈
  • 驚自己無能力安全通過截跑點,可以申請調至半馬一組或半馬二組


>> 伸延閱讀:《[渣打香港馬拉松2019] 半馬挑戰組新增截跑點 2個鐘馬師道截人

至於半馬一組及半馬二組,仍然維持限時三小時,中途無截跑點。呢兩組過咗限時,因為賽道仲未關閉,所以按慣例仍可以在繼續作賽,不過無完賽證書。咁跑到幾時? 就係根據全馬二組 (7點起步) 嘅截龍時間,所以就算8點半起步,四個半鐘內,可以完成21公里,1點前返到維園。

10公里限時及拉閘時間

10公里項目 (不包括輪椅賽),起步時間由05:45至08:15,分6組。限時情況如下:

  1. 起點: 於起步時間後10分鐘關閉起步區,該組別未起步的參加者作棄賽論,不能參加其他組別
  2. 終點: 限時兩小時,逾時者取消資格,沒有完賽證書

當然,如果你真係好享受比賽,亦唔介意無證書,都可以喺東區走廊慢慢行 (不過我哋絕對唔鼓勵,因為咁會阻住其他參加者)。東區走廊喺最後一組限時過咗之後,即係10點15分正式關閉。賽道上嘅參加者,將由大會安排嘅接駁巴士,送返終點。

全馬拉閘時間

全馬限時6小時,更要準時通過以下關卡,否則會被DQ。

按圖放大

跑緊馬拉松,兵荒馬亂,未必可以記到呢啲時間。有人會選擇用配速表,將拉閘時間寫喺手臂上,亦有人Cap圖放喺手機,總之知道自己要趕路,就要搵方法記住時間。

圖片來源: 渣打香港馬拉松大會網站

要注意嘅係,當最後一組 (馬拉松二組,即係7點起步嗰組) 過咗限時,大會係會隨即拉閘截人。換句話講,如果你係全馬一組甚至係挑戰組,就算過咗限時,都仲有機會喺賽道上跑,只係無證書及完賽牌。

以下係2017年馬師道拉閘情況:

中途退賽程序

首先要明白,中途退賽唔代表你可以提早離開賽道返屋企,除非你嚴重受傷,要去醫院接受治療。

根據大會網站:「大會建議您在水站等候,並向工作人員聲明您要退出比賽,賽會巴士將接載您到終點。」即係話退賽之後,係無得周圍走,更加唔可以離開賽道自己搭車。而接駁巴士 (俗稱回收車) 幾時開車視乎供求及交通情況,所以隨時要等一段長時間,先可以返到終點拎行李。

另外,全馬、半馬嘅水站,每5公里一個。10公里水站在4公里及7.5公里位置。

記住,跑馬拉松並唔係參加毅行者,中途退賽係無得走人返歸的,所以為免飢寒交逼等待回收車,你點都要用盡全力準時返到終點!

Fitz連結: https://fitz.hk/?p=113600

更多:
Fitz Facebook專頁
[渣馬備戰攻略] 寒冷天氣跑步大法 (日常練習與比賽須知)
[渣馬備戰攻略] 可以用跑步機練馬拉松嗎? (或其他長跑距離)
[渣馬備戰攻略] 科學支持 5種比賽前中後的飲食偏方
[渣馬備戰攻略] 4條經典長課路線
[渣馬備戰攻略] 如何進行長課練習?
Fitz Running 跑步

廣告
Fitz
我哋坐唔定、無時停,唔做運動唔舒服! 只要係有用知識、重要資訊,以至好玩話題,Fitz都會全力搜羅,同時鼓勵「郁民」齊齊參與,打造一個開放嘅運動生活資訊平台。