[花姐跑攝遊世界] 玻利維亞越野賽的比賽報告 (比賽上篇)

戰戰兢兢嘅心情下，比賽，要開始了。參賽者中亞洲跑手人數寥寥可數， 女子組更只得我一個係亞洲人; 我同自己講，點都好，千祈咪包尾呀!

成個比賽都係響海拔3600米上舉行，早上尤其冰涼; 不過第一日仲係響小鎮出發，加上九時開賽太陽已經高高掛，著住件風褸下感覺都叫做頂得順。 比賽七日中頭四日都係響山區小鎮中穿插 賽事總監仲提醒: The beginning of the race is to ascent a mountain!” 一開始就係要上5km斜路及攀升500米，即係已經過 4000 米了! 如我所料果然一開始就係響 La Paz 住左十多年嘅法國跑手阿 Anne 一馬當先，其他幾位意大位嘅跑手一起步無耐就墮後晒。基於只係比賽嘅第一日唔知自己身體於高原適應如何， 加上顧慮 CP 後有19KM 完全無 support 我需要留力，一起步我唔敢太進取，上斜只係急步行同埋同阿 Anne 保持一個響視線範圍內可以見倒嘅距離。上個山嘅過程對腳都好重同好索氣，到頂嗰陣小腿好麻， 落山都只能夠慢慢 jog 咋。

每日分段嘅賽距，最後由230km減至220km

亞洲嘅代表響晒度，圖左係台灣嘅Vince，中間係嚟自日本嘅 Keigo

第一日就係響呢度起步啦

比賽開始前大家影返張合照先，本來係有25個參賽者，最後得返22個

----- 廣告 Ad -----

賽事一開始就即刻上5km 斜路，因為未知自己對高原適應如何一開始我都係好保守地急步行多

基本上落山之後我地一直都係響山區之間嘅車路上面跑，闊度夠，多沙泥多碎石，唔大幅度嘅上上落落，頭半程都尚算順利。CP 後因為太陽越嚟越猛烈同風少左啲好乾燥，個人開始有疲態。比賽嘅第一日其實係我地嘅中秋節，我早已準備左半個月餅留響 CP 後食愛嚟補充體力，結果真係好得喎食完有段時間個人長返好多力! 往後嘅路亦唔算太難，我同 Anne 一直拉鋸著互有領先，最後臨到終點一公里前我過佢頭後咬緊牙筋一直 jog 返終點，僅僅贏倒阿 Anne 一分鐘。過左終點後真係不停咁要扯氣，對腳又唔算好攰，但如果叫我再跑又真係跑唔郁了。

第一日個背囊係最重，不過之前練揹開10kg，而家揹7.5kg相對嚟講係算輕鬆

我一直緊貼住領先嘅阿 Anne，半程開始我地互有帶頭

比賽嘅第一日係我地嘅中秋節，點能夠唔食月餅呢?

----- 廣告 Ad -----

途中經過一個好細小嘅村落，啲小朋友好開心咁同我地打氣

最後嗰 km我發力啦!剛好過左阿 Anne 頭

終於到左第一昭山嘅終點，僅僅贏阿 Anne 一分鐘咋

第一日33KM跑左5個多小時，返到終點我趁住 Tentmate 未返拿拿聲抹身、執背囊、 拉筋同煮野食，希望早啲搞掂晒就早啲訓覺休息。6點左右 Jerome 同大家 briefing 報告下今日個賽事成績。雖然意外地今日係第一個女子組衝線 (唔駛包尾呀!)，不過同其他跑手時間相距唔多，又不過呢個意料之外嘅第一位唔多唔少激發起我嘅鬥志：無諗過第一日就帶頭喎! 唔知可唔可以繼續保持呢個優勢呢??

呢晚 Briefing 完我早早就寢希望等自己多啲休息明天有狀態繼續跑好個比賽，但係由想訓開始發現頸邊兩旁ｄ皮膚好燙同好痛; 死火! 我嗰陣先知道自己原來曬傷左，而且痛到唔係好訓得著呀!

今日個 end point 響 Salar de Coipasa，位置偏僻但給予人一份與世隔絕嘅寧靜感

end point 有鋪定左啲地毯比我地休息做 cool down、拉筋等等

呢個係廁所，基本上只係響地下挖左一個窿，會滿囉!

趁 tentmate 未返趕快搞掂晒啲野，梳洗、執背囊同醫肚。圖左係嚟自土耳奇嘅 Gurkan，佢患有先天糖尿病，要邊跑邊度住血醣。今日佢係第二名衝線，佩服!

每日黃昏都有個 briefing 宣佈成績同埋講解明天比賽要留意嘅地方

----- 廣告 Ad -----

一收太陽氣溫就急跌，大家都匿埋晒響營入面。但今日係中秋，點都要賞下月……兩秒咁多啦～XD

因為第二日要7點前收營，我地要晨早5點半左右起身。其實尋晚收太陽開始氣溫已經立即急跌凍到唔敢離開個營，5點幾起身太陽都未出就真係凍到手腳僵晒係咁打冷震，連個營都結左冰可想而知有幾凍! 大會起左個火堆比我地取暖都好我地都係咁不自主咁抖震。 今日比原先 set 嘅距離縮短左9公里，只係需要跑25km，所以我打算試一試頭段 keep 住 Jog 睇下得唔得。一開始我大概用住7分至7分半嘅 Pacing 帶出; 頭段天氣清涼，加上路段較為平坦，一路個感覺都好暢順，亦都唔見有其他女跑手超越過自己。嗰陣我有啲暗地裡高興，唔知自己有帶前左幾多呢? 不過我無擰轉頭望有乜人響我嘅後面; 從來響比賽我都覺得應該係向前望，總之跑好自己就已經夠了。

清晨7點前收晒啲營，所以要5點半左右起身，太陽未出真係超凍，好彩大會都細心會起定個火比大家取暖

大家都一早起身執拾準時響0830出發

凍到個營結左霜，我條毛巾係硬晒

出左太陽就開始暖啲，大家都精神爽俐

今日見攀升唔多，而且只係25km, 我就盡量jog 倒幾多就幾多

起步一路都無女子組過我頭，附近見倒嘅都係男子組嘅跑手

唔理後面係幾多人、唔理同佢地距離有幾遠，總之向前望盡力跑好自己就夠了

到 CP 前開始係上斜嘅路了，一上又係好幾km，加上太陽開始越來越猛烈，我開始要慢返啲落嚟；有啲時間急步行有啲時間就 Jog 下咁～ 呢一日發揮得唔錯，仲快過好幾個響第一日快過我嘅男子組跑手。 唯一辛苦嘅就係兩膊曬傷位一直都好痛，尋晚已經急救搽左啲蘆薈希望可以舒緩一下痛楚。今日個 end point 響一個叫 Alcaya 嘅小鎮，又係可以第一名衝線呀! 今次同第二名衝線嘅女子組有成10幾分鐘! 不過今日第二名衝線嘅並非亞Anne而係28 歲嘅 Chiara; 之前我已經留意倒 Chiara 應該係跑開路賽，第一日因為有上山而且跑 trail 多，我同佢嘅時間差距較大。今日路況較平同多硬地有利佢發揮，我同佢嘅時間差距明顯係少過尋日好多。未幾跟住到阿 Anne 衝線，誰不知連第一日遲我好多衝線嘅 tentmate Laura 都好快返左嚟。當晚 briefing 大會公報成績嗰陣雖然我係唯一一個女仔可以響4個鐘內完成，但我同 Chiara 及 Laura  嘅時間差距比第一日少左; 我知道，競爭將會很激烈。

比賽第一日已經曬傷左條頸，為免傷上加傷呢一日開始我響帽後面都加返塊布擋住啲陽光

----- 廣告 Ad -----

經過 MDS 一役有左經驗，今次帶左啲蘆薈去搽曬傷部位舒緩痛楚

CP 後陽光好猛烈，加上要上長命斜，我開始要jog下行下咁

衝線啦! 繼續都係第一個女子組返到終點，喜出望外

第二日嘅終點響一個叫 Alcaya 嘅小村落，不過一個人都見唔倒

早返到終點嘅參賽者好鐘意響度曬下太陽，亦係因為陽光太猛烈下營入面又熱又焗，出嚟抖下氣仲好

每兩個參賽者 share 一個營，營入面雖然算寬敞，但早啲返到嚟就可以多啲位比你散開晒啲野慢慢執；今日 Laura 好早就已經返到嚟了

第二晚我依然訓得相當唔好，盡管我天未黑已經就寢，但係完全訓唔著；兩膊嘅痛楚令我成晚都響度典來典去搞到成一兩點先訓 (但係又5點幾就要起身喎~)。之前 briefing 話過今日又要再上4000米，我都不知幾擔心今日唔夠精神；不過又出奇地就算訓得短呢日我一起身都好精神爽俐。來自 Luxemburg 嘅 Tun 係全部參加者中最活躍最搞笑嗰位跑手，成日週圍撩人玩，今日一早佢唔知邊度拎左個度含氧量嘅儀器逐個人夾手指，結果一夾我讀數有成97，含氧量係眾人最高唔知係咪因為咁，今日一開始上山除左頭10分鐘剛剛開始上坡有啲索氣之外，跟住越行越有氣有力， 完全唔覺自己響高原! 我仲一個又一個咁追左幾個男跑手，個感覺真係無得頂!

每一日都係晨旱就要起身作準備

執好晒野我第一件事一定係企埋火堆度取暖，因為真係好好好凍

今日個含氧量相當唔錯，結果我上山非常有氣有力

一開始就要上山，仲要幾斜同啲路幾碎下

到頂嘅時候已經望倒遠處嘅鹽湖

落山囉～我嘅強項～衝落去咁滯

到頂後我地沿山路跑返落 Salina，穿過 Salina 後一直向鹽湖方向跑過去。今日真係好似食錯藥，一路都 jog 得起，群住山邊嘅路可以係咁跑。去到20km左右就到台灣跑手 Vince 一直一前一後相伴跑返終點。 返到終點嗰陣原來我係第8個人返左嚟。啲男子組見到我都好愕然仲讚我跑得快。嗰陣我真係好興奮，完賽後個力氣仲好充沛。 呢一日第二個返終點女子組繼續係阿 Anne，跟住到 Chiara 及 Laura，三人都相差有50分鐘之多。今日後我有一個相當明顯嘅優勢，我開始諗，咦，除左力拼保住千祈唔好包尾外，其實，我係咪可以試下一爭長短競逐名次?

往後嘅路都算平坦，成程我都jog得起

20km後開始碰上Vince，大家就一路一前一後咁跑返終點

多謝Vince幫我影左呢張相，個感覺好浩瀚

嘩～衝線啦～嬴成50分鐘之多，拉開左同其他參賽者嘅距離

今日個 end point Colcaya

之前介紹左個廁所，呢個係專係比你愛嚟抹身嘅地方，佢會預備一桶水唔駛用自己啲水，早到早享受，遲左用晒啲水就無架啦

每日返到終點先會派兩lit水比你，另外兩Lit 要響5 點後先派比你，唔知點解會咁安排

差唔多黃昏嘅時間大家都開始煮食然後就會早啲休息

今日係跑 trail 嘅最後一日，聽日開始就響鹽湖上跑。鹽湖面其實係實的所以與路跑性質接近。Trail run 同 road run 兩者之間我前者較佳，所以我諗緊今日係咪都應該要搶多小小時間將距離再拉開儲多啲  buffer 比自己，但同一時間又要留力應付第6日嘅42公里 (真係好難拿捏呀!)。Jerome 響起步 briefing 提及今日並唔係 flat road，結果起跑無耐又要上斜仲要係長命斜。起步無幾耐，咦? 對腳重重地提唔起嘅?! 而且好快就覺得氣促! 我不禁暗驚，尋日應付得好輕鬆吖，做乜今日完全跌晒 watt 嘅呢? 落山都好對腳都係好墜無晒之前啲 彈跳能力。我咬緊牙關盡量 jog，但捱到 check point 前已經再 jog 唔起了。

成個賽有一隊四架車嘅車隊，每朝早執拾完其中兩架就會先行開車去下一個 end point set 場，另外兩間就一路沿途巡視參賽者嘅情況

跑左唔夠1km又開始上長命斜，去到第4日大家都有返咁上下攰，上斜大部份人都係行

落斜開始對腳已經重重地，今日狀態真係好麻地

經過一啲小村落，個樣似無人住荒廢左咁

沿途都有好多呢啲殘破嘅石屋，我即時諗起天空之城馬丘比丘

正所謂屋漏又兼逢夜雨，去到 CP 嗰陣我發現其中一個軟膠水袋穿左 (我新買架!!) 好彩大會規定要帶裝倒 2 lit 水嘅器具，我總共分開左4個軟水袋，穿左一600ml我仲有1400ml點都頂倒返去今日嘅終點。加上當時已經跑唔起，平時都 train 過下自己飲少啲水，一向耗水量唔多嘅我應該勉強都應付倒捱到尾。不過嗰陣心情真係跌左落谷底，尤其我真係擔心因為 jog 唔起會比其他人追左上嚟。好彩一路都無女子組越過我。最後嗰兩km真係好沮喪，太陽好猛烈曬到個人好辛苦好似要揸乾個人咁，雖然最後我都係第一個女子組衝線，但衝完線我完全無喜悅嘅感覺，反而係憂心重重提唔起勁。弊了，今日狀態突然急跌左好多，嚟緊實牙實齒仲有90幾km要響鹽湖上面跑，咁點算好呢??

CP 其實好簡單，只係得一個人企響度同埋有幾樽大水擺左響等你斟。嚟到呢度嗰陣我仲發現個軟水樽忽然擘開左窿，但係我新買架喎!

左手邊已經係 Salar de Uyuni 啦～ CP後嘅路其實一啲都唔難，但唔知點解硬係跑唔起

斷斷續續都見倒啲小村落，呢度 Tahua

呢間屋係用鹽造架～

穿過埋呢度就到今日個 end point 了

望穿秋水終於見到 end point; 但係衝左線後一啲興奮嘅感覺都無，反而係擔心同焦慮仲多

今日個 camp site，基本上頭四日比賽都係兜住呢個火山 Tunupa Volcano 嚟跑

(待續)

花姐跑攝遊世界 Facebook 專頁
Ultra Bolivia Race大會網頁

Fitz連結: https://fitz.hk/?p=106825