Fitz > 運動 Sports > 跑步 Running > 賓叔叔唔跑得齋講跑系列 (五) | 跑步裝備: 要Fashion又要Function

續上篇:《唔跑得步,講下「跑步」同「跑下步」

賓叔叔嘅人生座右銘係 “ 貪威識食,腌臢腥悶,姣斯躉篤,惡死睖瞪!” 自不然對跑步衫褲鞋襪裝備有少少要求,一言以蔽之,要Fashion又要Function。

每個人對跑步衫要求都有所不同,不管牛記笠記定 Nike Under Armour ,簡單二分法可以係鬆身同緊身,無話邊種好啲邊種唔好,最緊要自己舒服自然,我識得一位知名教練,跑步直情最憎著衫,我懷疑佢除咗 show 身材之外,應該有研究過呢個係減低風阻最佳方法,而的確佢運用上身裸跑法之後,無耐就 Sub-3,如果當時大會俾佢唔著衫,應該起碼快幾分鐘。

當然,最緊要好睇!

至於跑褲,有人鐘意超短超簿,有人鐘意長少少連內膽,有人鐘意著 Compress Tight ,都係嗰句,舒服同唔會太多磨擦就好,反而長課的話,我會選擇著 Legging ,反覆嘗試之後發覺小腿的確無咁倦,信不信由你。

當然,最緊要好睇!

正如煲仔飯最緊要用乜嘢米,蒸肉餅最緊要有肥豬肉,醃豬扒最緊要落蘋果蓉一樣,跑步最緊要係對鞋,著乜品牌嘅鞋最好跑真係人人不同,未必一定碳纖維高科技就最好,甲之熊掌乙之砒霜,叔叔因為高弓足,試過入手一雙眾口稱譽嘅簿底 ASIC 金邊跑鞋,結果搞到要睇醫生,從此知道簿底鞋同我無緣了。所以邊款跑鞋啱你,真係要做多啲功課,同埋盡量去試下,好難一概而論,同價錢未必有必然關係。

當然,最緊要好睇!

但其實重中之中,而又好多人忽略嘅叔叔認為係對襪,佢嘅重要性非常之高,因為佢係你腳掌最後一道防線,直接減低你皮開肉爛,起水泡痛不欲生嘅機會,透氣唔易積聚腳汗,唔好有虛位產生磨擦,襪頭唔會跣落嚟,至於厚薄,就視乎個人習慣喜好同天氣,一雙好嘅襪子,總對對你嘅跑步成績有莫大關連。

當然,都係最緊要好睇啦!

帽同太陽眼鏡,呢兩樣唔使解釋,直接總結。

當然,梗係最緊要好睇!

(待續)

「賓叔叔」雷彬冶文其他文章


文章為作者意見,不代表Fitz立場。
歡迎投稿: https://fitz.hk/contribute/