[三嬸一叔] 一個元老跑手的誕生

大叔有火

D大叔是「三嬸一叔」的成員，在廿多年的跑步運動履歷中，獎項一欄是空白的。直至2017年，竟然神奇地可以上大台領獎 (其實只得第七)，雖然已是50+的元老跑手，卻激發起什麼激素什麼丸酮，燃點起心中一團火，他見到同cat的跑手10K做到38、39分，D大叔亦大膽以sub-40為奮鬥目標，當然難，但佢話:「易嘅嘢就唔會係目標啦。」男人就係要喱啲!

難得D大叔今次除低跑鞋，拎起支筆，親自寫他在跑界的高低起落。看他的文章，你的臉龐還會感到那份灼熱!

一個元老跑手的誕生

有啲人嘅運動生涯開始得比較早，而我就廿幾歲先開始去健身同跑步，但過程中我主要係同啲朋友吹下水、評論時事同講是非，所以既唔大隻，又跑得慢，不過好處就係唔會有傷患，同埋令我精神健康D，就係傻下傻下咁走過之後果廿幾年嘅高山低谷。

除咗 hea 跑之外，我間唔中亦會參加一啲10K賽感受一下比賽氣氛，本住「友誼第一，比賽第二」的精神，我同其他參賽者保持住良好友誼，從來唔會衝擊啲獎杯或者獎牌。

初嘗獎滋味

呢個情況直到2017年9月「愛跑香港地」路跑比賽有所逆轉。這是以懷舊香港為主題嘅10K賽，一如既往，响同其他跑手維繫完感情就離開武林勝地科學園。兩日後即管上網 check 下結果。吓，分齡組別第7，仲竟然有獎 (因為每個組別有10個獎)? 我腎上腺即時上升。時間呢? 48:42。咁都得?

我好後悔。點解唔留低睇賽果呢?如果當時在場，咪可以上台領獎同影相囉! 打電話問下有無獎牌或獎品、同埋可唔可以補領先？結果當日中午我連飯都唔食，就由金鐘寫字樓去咗新蒲崗果間攪手公司，就係為咗攞張得獎証書，之後就好似啲醫生掛張牌照出嚟咁，將果張A4紙咁大嘅得獎証明掛响我寫字樓埲牆度，等所有入嚟嘅同事都見到。

呢個經驗令我對友誼嘅態度有唔同嘅詮譯，我開始想攞獎。友誼? 係咩嚟㗎?

喺之後果三個月，我參加咗幾個10K賽，期望再次出現奇蹟，但世界係公平嘅，現實係殘酷嘅。一般比賽，每個分齡組別只有三個獎，我跑48分幾嘅，算吧喇! 我開始諗我係咪不自量力呢?

呢種失落嘅感覺差啲將我打沉。好彩我之後參加咗跑界 “神鵰俠侶” 家豪同潔貞喺2017年12月31日舉辦嘅「樂家 X 琥珀除夕邊境跑」。我覺得佢地兩個好善良，原因係呢場比賽每個年齡組別嘅第1至10名都有獎杯。結果? 我分齡跑第9，時間係45:24。雖然我唔係好鍾意個9字，但總好過無。而組別嘅冠軍就成為咗我嘅偶像同朋友，佢就係 Jackie，當日佢跑39:36。

呢次我留低咗睇賽果同上台領我人生嘅第一個獎杯，我當時有啲激動，重有少少淚水。上台領獎果陣，我覺得唔著件外套會型啲，結果我領嘅唔止係一個獎杯，重領埋感冒。

團火爆發

喺「樂家 X 琥珀除夕邊境跑」分齡組別攞咗個獎杯後，我同 “少林足球” 嗰個 “醬爆” 一樣，心理嗰團火終於爆發。我參加跑班、睇書、睇 YouTube，研究點樣可以跑快啲，而「私(屍)跑」(好似喪屍咁自己一個人跑) 就成為咗我嘅主要活動，科學園亦變成我每個星期日「出火」嘅地方。

為咗呢團火，我飲少咗酒，見少咗朋友；無幾耐，就連啲朋友都唔見埋。當然，有付出總有收穫，10K時間跑41分幾、屋企多咗一堆獎杯同獎牌，同埋衣櫃多咗好多跑tee。屋企人叫我將堆爛銅爛鐵清理一下，我唯有將佢哋搬番公司，一部份放喺文件櫃頂，俾自己間唔中欣賞吓，另一部份就暫時 (無限期) 擺喺個 “吉盒” 度。至於啲跑tee呢? 咪變咗睡衣囉。

其實，喺我同齡組別嘅精英跑10K係 sub-40 㗎，只不過佢哋唔係每次都參賽，我先至有機會也文也武，上台領吓獎。雖然我知道呢個事實，但依然接受唔到。喺2019年一場比賽中，可能因為有少少獎金，結果班精英出番嚟，我7名不入。跑完之後我啲肌肉好痛，但個心更痛。

時間係治療傷痛嘅良藥。過咗一個星期，我已經唔覺得痛，但傷痕仍在。為咗唔想再經歷同樣打擊，我加倍努力，重新上路，sub 40就成為我嘅目標。我知道唔易，但易嘅嘢就唔會係目標啦!

Sub-40 現在仍然係我嘅目標，即係話我仍未做到。有跑友話我年紀又大咗一年，依家更難達到。但我訓練同經驗多咗一年喎，而且體能、技巧同心態上我都有進步，成功機會唔係會大啲咩?!

作為一個快要步入元老級別嘅跑手，我知道自己喺體能上嘅限制，但如果一齊企喺起跑線隔離果位同齡跑手做得到，點解我唔得? 我想試下!

後記

「三嬸一叔」的成員除了D大叔外，還包括 May 姐、R和C大嬸，都是跑班 (豐山跑) 的同學，因為參加一次攀爬比賽組成了這個團隊 (「三嬸一叔的十日瘋狂」) 。「三嬸一叔」的面書專頁已經建立，主要分享中年的運動、生活、健康、正能量等資訊，鼓勵有半把年紀的，訂一些目標，可以是運動跑步、社區參與、或任何生活藝術的活動，不怕無聊，總之要保持那團繼續前進的火，不被年齡所局限。

「三嬸一叔」的首席長老，May 姐的故事早前已刊登 -「人不瘋狂枉老年」